07:41, 13 Ақпан 2019 | GMT +6
Делиде қонақүй өртеніп, 17 адам ажал құшты
АСТАНА. ҚазАқпарат - Делидегі Arpit Palace қонақүйінде өрт болып, 17 адам құрбан болды. Оның ішінде жас бала да бар, деп хабарлайды ВВС.
Бұл мәліметті Үндістан полициясы таратқан.
Видеода адамдардың 4-қабаттан секіріп жатқаны көрінеді. Өрт сейсенбі күні таңғы уақытта болған.
Билік өкілдері 35 адам құтқарылғанын мәлім етті. Бірнеше адам жарақат алып, ауруханаға түскен.
Қонақүй Карол-Ба деп аталатын орталық ауданда орналасқан. Ол жер туристерді базарларымен, сауда сататын көшелерімен және арзан бағалы қонақүйлерімен тартады.
БАҚ таратқан ақпаратқа сай, ажал құшқандардың көбі адамдардың бір-бірін жаншып-таптауынан өлген. Қазіргі сәтте оқиға неден болғаны анықталып жатыр.