ДДСҰ ВИЧ-инфекциясының алдын алатын жаңа препаратты пайдалануға кеңес берді

НҰР-СҰЛТАН. ҚазАқпарат – Дүниежүзілік денсаулық сақтау ұйымы (ДДСҰ) АИТВ-жұқпасының жанасуға дейінгі алдын алу құралы ретінде ұзақ әсер ететін инъекциялық каботегравирді (КАБ-ДД) пайдалану бойынша жаңа ұсыныстарды жариялады. Бұл туралы ҚазАқпарат БҰҰ Жаңалықтар орталығына сілтеме жасап хабарлайды.

ДДСҰ елдерді АИТВ жұқтыру қаупі жоғары топтардағы адамдарға осы профилактикалық препаратқа қол жеткізуді қамтамасыз етуге шақырады.

2021 жылы АИТВ-инфекциясының 1,5 млн жаңа жағдайы тіркелді. Өткен жылы күн сайын 4000 жаңа АИТВ инфекциясы анықталған. Әлемдегі АИТВ-инфекциясы жағдайларының 70 пайызы негізгі қауіп-қатер топтарына (секс-индустрия жұмыскерлері, ер адамдармен жыныстық қатынасқа түсетін ер адамдар, инъекциялық есірткі қолданатын адамдар, тұтқындар мен трансгендерлер) және олардың жыныстық серіктестеріне тиесілі.

«Ұзақ әсер ететін каботегравир - АИТВ-инфекциясының алдын алудың қауіпсіз және тиімділігі жоғары құралы, алайда әзірге ол тек клиникалық зерттеулер шеңберінде ғана пайдаланылып жүр. Жаңа ұсыныстар АИТВ-ны алдын алудың басқа әдістерімен қатар, КАБ-ДД жоспарлау және енгізу бойынша елдердің іс-қимылын жеделдетуге көмектеседі деп үміттенеміз», - деді ДДСҰ АИТВ инфекциясы, вирустық гепатит және жыныстық жолмен берілетін инфекциялар жөніндегі жаһандық бағдарламасының директоры доктор Мег Доэрти.

КАБ-ДД – алғашқы екі инъекциясы төрт апта аралықпен, содан кейін әрбір сегіз апта сайын салынатын ұзақ әсер ететін препарат.

Фото: news.un.org