Дәулет Ниязбеков Токио олимпиадасына жолдама жеңіп алды

НҰР-СҰЛТАН. ҚазАқпарат – Елорда төрінде күрес түрлерінен өтіп жатқан лицензиялық Әлем чемпионатында еркін күрестен Дәулет Ниязбеков Токио 2020 Олимпиадасына жолдама жеңіп алды, деп хабарлайды ҚазАқпарат тілшісі.

Еркін күрестен ерлер арасында 65 келі салмақ дәрежесінде үш дүркін Азия чемпионатының жеңімпазы, қазақстандық Дәулет Ниязбеков ширек финалда моңғолиялық Тимур Очиромен кездесіп, 6:2 есебімен жеңіске жетті. Осылайша отандасымыз әлем біріншілігінің жартылай финалына өтіп қана қоймай, Олимпиада ойындарына жолдаманы қанжығаға басты.

Ол 1/8 финалда неміс балуанын ұтып, ширек финалға шыққан болатын. Енді Дәулет Ниязбеков жартылай финалда өз салмағының үздігі, әлемдік рейтингте бірінші орында тұрған үндістандық Бажранг Пуниямен белдеседі.