+7 (701) 759 90 19
USD 376.51 EUR 418.91
RUB 6.13 CNY 54.90
Jańalyqtar

Дәулет Кәрібек: Жастар жылы – әлеуметтік мәселелерді шешіп беру ғана емес

2019 жылғы 13 желтоқсан 10:57
Бөлісіңіз:
Дәулет Кәрібек: Жастар жылы – әлеуметтік мәселелерді шешіп беру ғана емес

НҰР-СҰЛТАН. ҚазАқпарат - ҚР Президенті Қасым-Жомарт Тоқаев Жастар жылының жабылу және Волонтер жылының басталу салтанатына қатысып, жастардың жан-жақты дамуына жағдай жасау – Президент ретіндегі басты міндеттерінің бірі екенін айтқан болатын. Осыған орай «Nur Otan» партиясы «Jas Otan» жастар қанатының төрағасы Дәулет Кәрібек еліміздегі жастар саясатына қатысты ойымен бөлісті.

Ұқсас жаңалықтар
Тәуелсіздіктің бұлтартпас ақиқаты Ақтөбеде волонтер мемқызметшілердің пулы құрылады Қазақстан өңірлерінде волонтерлікті қолдауға арналған орталықтар ашылады

4-5 ЖЫЛДА ЕЛІМІЗДІҢ ҮШТЕН БІРІН ЖАСТАР ҚҰРАЙТЫН БОЛАДЫ

Елбасының 2019 жылды Жастар жылы деп жариялауының мәні тереңде жатыр. 1990-2000 жылдар аралығында бізде демографиялық ахуалымыз мүшкіл хәлде болды. 2000 жылдан экономиканың күшеюіне, елдің әл-әуқатының жақсаруына байланысты демографиялық ахуал түзеле түсті, «бэби-бум» болды: жыл сайын 400-500 мың нәресте дүниеге келе бастады. Жақын 4-5 жыл ішінде еліміздің үштен бірін, яғни 30% астамын жастар құрайтын болады.

ЖАСТАР ЖЫЛЫ ЖАЛҒАСЫН ТАБАДЫ

Жастар жылының жабылу және Волонтер жылының басталу салтанатында Мемлекет басшысы Қасым-Жомарт Тоқаев Жастар жылы 2019 жылмен аяқталып қалмайтынын айтты. Мысалы, жұмыс істейтін жастарды тұрғын үймен қамтамасыз ету 2021 жылға дейін жалғасады.

Сонымен қатар, биыл 5 мыңнан астам адам «Жас кәсіпкер» бағдарламасы бойынша грант ұтып, бизнесін ашса, бұл бастама келесі жылы да жалғасын табады.

«Жас маман» бағдарламасы аясында еліміздің 17 өңірінде 180-ге жуық колледж, 20-ға жуық жоғары оқу орны жаңғыртылып, сұранысқа ие мамандықтар бойынша білім бере бастайды. Ол бір жыл ішінде тыңдырылатын жұмыс емес.

«Дипломмен – ауылға» бағдарламасына бөлінген қаржы бұрын 13 млрд теңге болса, Жастар жылы аясында Мемлекет басшысы қаржы көлемін 20 млрд теңгеге дейін ұлғайтуды тапсырды. Бұл да келесі жылдан бастап іске асырылады. Демек, Жастар жылының өзіндік жалғасы бола бермек.

БЕРЕКЕЛІ ОТБАСЫ – БАЙ-ҚУАТТЫ МЕМЛЕКЕТ

Жастар жылындағы басты мақсат – жастардың әлеуметтік мәселесін шешіп беру ғана емес, жастардың бойындағы ұлттық құндылықтарды қалыптастырудың жаңа бағыт-бағдарын айқындау деп айтуға болады. ҚР Президенті берекелі отбасы болмай – бай-қуатты мемлекет болмайтынын, оған жастардың баса назар аудару керектігін атап өтті.

1997 жылы Елбасымыз Нұрсұлтан Назарбаев жобалық менеджментті мемлекеттік басқаруға енгізген болатын. Бұл жолы Мемлекет басшысы Қасым-Жомарт Тоқаев соның сабақтастығы ретінде жастар саясатында бағдарлама дайындауға тапсырма берді. Бағдарлама әлеуметтік топтарға қарай бөлініп, бәріне түсінікті болатындай дайындалуы керек. Бұл да жастар саясатына берілетін мүмкіншілік.

ФЛЕШ-МОБҚА ҚАТЫСУ – ВОЛОНТЕРЛІК ЕМЕС

Біздің елде волонтерлікті жастармен байланыстыратындар көп. Бұл сөздің тарихына үңілсеңіз: Батыста Отан қорғайтын кезде тұрақты әскерден бөлек, азаматтар өз еркімен соғысқа қатысқан және соны волонтерлік деп атаған. Қазіргі таңда бұл ұғым өзгеріп, басқаша сипатқа ие болды. Волонтерлікті түрлі флеш-мобқа қатысу деп ұғынатындар да бар.

Шын нәнінде волонтерлік деген қазақтың дәстүрінде бар дүние. Мысалы, асарлатуды айтуға болады. Үй салуға, мал союға немесе шабындыққа көмек керек болса, ағайын-туыс, көршілер келіп көмектесетін болған. Бұрын ол «асар» деп аталса, қазір «волонтерлік» деп аталады. Екінші мысал – жылу жинау. Бұл да қазіргі тілмен айтқанда волонтерлік болады. Демек, мұның бәрі дәстүрімізде бар дүниелер, тек жаңғырту керекпіз. Атауы басқаша болғанмен – рухани жаңғыру деген осы.

ВОЛЕНТЕРЛІК – ІЗГІ ҚАСИЕТТІ ОЯТАДЫ

Волонтерліктің нақты бағыттары болатынын Президент өзі жік-жікке бөліп көрсетіп берді. Мысалы, медицинаға қатысты, экологияға қатысты волонтерлік. Мұның бәрі Қазақстанда волонтерліктің дамуына ықпал етеді. Біздің қоғамда «Мен өз жұмысымды істеп жүрмін, не үшін қосымша жұмыс істеуім керек?» деп ойлайтындар аз емес. Ал неге «Қоғамға қайтсем пайдам тиеді?» деп ойламасқа? Өмірге адам болып келгеннен кейін артыңда із қалатындай ізгілікпен өмір сүруге не жетсін? Волонтерлік адам бойындағы осы қасиетті оятады деп ойлаймын.

Кезінде әл-Фарабидің «Қайырымды қала тұрғындарының көзқарастары туралы» трактатын оқыдық. Онда «Қайбір қалада ұрлық, зорлық-зомбылық сияқты нәрселер болмас үшін ол жерде қайырымды азаматтар болуы керек» деп айтылады. Яғни, бір-біріне көмектесетін азаматтар жиналған қала құқық бұзылмайтын қалаға айналатынын айтады. Волонтерлікті дамытатын болсақ – жастардың уақытын тиімді өткізуіне жағдай жасаймыз.

КӨМЕКТЕСУ АРҚЫЛЫ ТҰЛҒАЛЫҚ ДАМУҒА БОЛАДЫ

Волонтерліктің тағы бір қыры – жастардың тұлғалық дамуына көп әсер етеді. Өзгеге көмектесу арқылы да тұлғалық дамуға болады. «Jas Otan» жастар қанаты жыл сайын 4,5 мыңнан астам жалғызбасты қарияларға, Екінші дүниежүзілік соғыс және тыл ардагерлеріне көмектеседі. Сол кезде байқайтынымыз: волонтерлікпен айналысатын жастар қызметтік жолда тез өседі. Неге екенін білесіз бе? Себебі олар үлкен кісілердің кеңестерін, ақылдарын естиді, батасын алады, құндылықтың не екенін түсініп, әр нәрсенің қадірін біліп, құр арманмен ұйықтап өмір сүруге болмайтынын ұғады. Экологиялық акцияға шыққан кезде де жастардың өздері су ішкен пластик ыдысты тастайтын қоқыс іздеп жүргенін, яғни қоршаған ортаны ластамау жолдарын іздеп жүретінін байқауға болады. Демек, олар уақыт өте келе қазір қоршаған ортаны ластаса – ертең зардабын тартатынын түсіне бастайды.

2020 жылы волонтерлікті дамыту басталса, ол 15-20 жылда күнделікті өмір сүру дағдысына айналуы керек. Мемлекет басшысы Қасым-Жомарт Тоқаев өз бастамаларын іске асыру үшін жастарды өз айналасына жұмылдырып, осы бағытта жұмыс істей береді.

Біздің каналымызға жазылыңыз:

Бөлісіңіз:

Автор:

Зарина Қаһарман

Загрузка...
Пікір қалдыру
+7
Жіберу
Сондай-ақ... оқыңыз
Загрузка...
ONLAIN QYZMETKERLER
REDAKTOR
Кожакелдиев Е.
Кожакелдиев Е.
954-059
REDAKTOR
Гүлмира Алякпарова
Гүлмира Алякпарова
954-059
REDAKTOR
Жарылқасын Саягүл
Жарылқасын Саягүл
954-059

MURAǴAT