Дәрігерлер коронавирус науқастарында жиі кездесетін ауруларды атады
«2021 жылдың 14 шілдесіндегі жағдай бойынша, 922 науқас ауыр және өте ауыр жағдайда жансақтау бөлімінде жатыр. Ең жоғары көрсеткіш Нұр-Сұлтан мен Алматыда, Қарағанды, Ақмола және Батыс Қазақстан облыстарында байқалады», - деді ҚР ДСМ стационарлық және стационарды алмастыратын медициналық көмек басқармасының бас сарапшысы Бауыржан Сатыбалды ОКҚ брифингінде.
Спикер медициналық ұйымдарда жатқан науқастардың 90%-ында созылмалы, кейде 2-3-тен астам ілеспе аурулар бар екенін атап өтті.
«Науқастар арасында ең жиі кездесетін аурулар – артериалды гипертензия (47%), өкпенің созылмалы обструктивті ауруы (11%), жүректің ишемиялық ауруы (10%) және қант диабеті (9%) кездеседі. Ауыр және өте ауыр жағдайдағы 922 науқастың 57,5%-ы 66 жастан асқан. Бүгінде 100 науқас немесе 13% өкпені жасанды желдету аппаратына қосылған», - деді Бауыржан Сатыбалды.