Дариға Назарбаева «Славянский базар» фестиваліне құрметті қонақ ретінде шақырылды
Тараптар екіжақты және көпжақты ынтымақтастық мәселелерін талқылап, парламентаралық үнқатысудың маңызды рөлін атап өтті.
Д.Назарбаева екі ел депутаттарының нәтижелі қызметін, атап айтқанда, инновация саласындағы ынтымақтастықты дамыту жөніндегі кіші комиссияның жұмысын атап өтті. «Сәуір айында біздің сенаторлар Минскіде болып, кіші комиссияның бірінші отырысын өткізді және ақпараттық технологиялар паркінде көрсетілген жетістіктерді тамашалады. Осы саладағы ынтымақтастықты Нұр-Сұлтандағы ЭКСПО алаңында тереңдету қажет», - деді Сенат басшысы.
Парламенттің жоғары палатасының төрағасы, сондай-ақ тауар айналымы мен технологиялар трансфертін арттыруға бағытталған бірлескен іс-қимыл жоспары аясындағы жұмысқа қарқын беруді ұсынды. Д.Назарбаеваның пікірінше, әзірге бұл бағыттағы жұмыс тек қағаз жүзінде жүргізіліп келеді.
Кездесу барысында 29 мамыр күні Нұр-Сұлтанда өтетін ЕАЭО мерейтойлық саммитінің маңызы атап өтілді. Саммит Еуразиялық ықпалдастықты дамытуда және елдер арасындағы экономикалық өзара іс-қимылды кеңейтуде маңызды шара болады. «Қысқа уақыт ішінде ауқымды жұмыстар жасалды, іс-қимыл аясы белгіленді, ал ең бастысы - ынтымақтастықты дамыту мен нығайту жөніндегі саяси ерік-жігер бар. Экономикалық мүдделер ықпалдастық үдерістердің басты қозғаушы күші болуы тиіс», - деді Сенат төрағасы. Ол экономикалық ынтымақтастықтың келешегі зор бағыттарын, оның ішінде көлік-логистика саласын атап өтті.
«Біз қазақстандық инвесторларды күтеміз», - деді Беларусь елшісі.
А. Ничкасов мәдени-гуманитарлық ынтымақтастық туралы айта келе, «Славянский базар» халықаралық өнер фестиваліне дайындық туралы хабардар етті. Сондай-ақ ол Д.Назарбаеваны өнер мерекесіне құрметті қонақ ретінде шақырды.