Darhan Káletaev azamattyq qoǵamdy damytýdyń negizgi máselelerin atady
QR Qoǵamdyq damý mınıstri Darhan Káletaevtyń aıtýynsha, aldaǵy ýaqytta shetelden donorlyq kómekti alýǵa qatysty ustanymdy ózgertý kerek. Qazirdiń ózinde donorlyq kómektiń kólemi qysqaryp otyr. Sebebi Qazaqstanda jan basyna shaqqanda ishki jalpy ónimniń mólsheri artty. «Demek, bizge osy saladaǵy dıalogty joǵary deńgeıge shyǵarý qajet. Endi, ózimizdi donorlyq kómekti alýshy retinde emes, óz aımaǵynda sol kómekti bere alatyn memleket retinde kórsetýimiz kerek. Sondyqtan osy saladaǵy qarym-qatynasty túbegeıli ózgertken jón. Ashyǵyn aıtý kerek, ázirshe bári LEGO konstrýktory sıaqty, áli naqty bir kartına joq. Sonyń bárin jınap, biryńǵaı konfıgýrasıany jınap shyǵýymyz qajet. Biz myqty úkimettik emes uıymdarǵa basymdyq berýge tıispiz. Sebebi olar jaqsy ıdeıalardy usynady, sheteldiń tájirıbesin de jaqsy biledi», - dedi D.Káletaev búgin azamattyq qoǵamdy damytýǵa arnalǵan ulttyq tyńdaýlarda.
Osy oraıda mınıstr taǵy bir máseleni atap ótti. Onyń sózine qaraǵanda, búginde úkimettik emes uıymdardyń sany artyp keledi.
«Qazirgi kezde tirkelgen úkimettik emes uıymdardyń sany 22 myńǵa jetti. Alaıda Qarjy mınıstrliginiń málimetine sáıkes, salyq tóleıtinderdiń sany 14 myńdy qurap otyr. Al bizdiń aqparattyq bazamyzda tek 4 600 uıym ǵana tirkelgen. Negizi, shetelde úkimettik emes uıym biryńǵaı bazaǵa tirkelmese, sosyn salyq tólemese, oǵan qarjy berilmeıdi. Bylaısha aıtqanda, uıymnyń tolyq portfolıosy bolýy qajet», - dep atap kórsetti D.Káletaev.
Aıta keteıik, búgin Astanada alǵash ret azamattyq qoǵam ınstıtýttaryn damytý máselesine arnalǵan ulttyq tyńdaýlar bastaldy. Qazaqstannyń azamattyq alıansynyń basshysy Asylbek Qojaxmetovtiń aıtýynsha, atalǵan sharanyń negizgi maqsaty - Qazaqstan Respýblıkasynyń azamattyq qoǵamyn damytý jónindegi tujyrymdany ázirleý. Atalǵan qujat 2025 jylǵa deıingi ýaqytty qamtıdy. Buǵan deıingi tujyrymdamanyń merzimi 2011 jyly aıaqtalǵan bolatyn.