Даниядағы Түркия елшілігінің алдында Құран өртелді
Сәрсенбі күні «Danske Patrioter» антиисламдық және ультраұлтшыл тобының (Дат патриоттары) мүшелері Копенгагенде мұсылмандардың қасиетті кітабына қарсы арандату жасады.
Арандатушылар тобы ислам дініне тіл тигізетін сөздерді ұрандатып, кейін Копенгагендегі Түркия елшілігі ғимаратының алдында Құранның көшірмесін жағып жіберді. Олар исламға қарсы сөздер жазылған транспаранттар көтеріп, түрік тауарларына бойкот жариялауға шақырды.
Акция полицейлердің бақылауымен өтті.
Айта кетейік, 27 шілдеде Даниядағы Ирак елшілігінің алдында Құран өртелген болатын. Ал 28 шілдеде «Danske Patrioter» оңшыл радикал топтың өкілдері Копенгагендегі Мысыр мен Түркия елшіліктерінің жанында қасиетті кітапты жағып жіберді.
Дәл осындай провокация шілденің соңғы күнінде Швецияда өтті. Парламент ғимаратына жақын жерде Ирак мигранттары Салван Момика мен Салван Наджем Құранды өртеді.
Қазір Дания мен Швеция үкіметтері сөз және пікір еркіндігі принциптерін бұзбай, Құран мен өзге де діни мәтіндерді көпшілік алдында жағу акцияларына қалайша тыйым салуға болатынын ойластырып жатқаны хабарланды. Кейінгі уақытта осындай акциялар аталған елдерге айтарлықтай проблема туындатып отыр.
Қазақстан Президенті Қасым-Жомарт Тоқаев бірқатар елде Құранды өртеу актілеріне қатысты пікір білдіріп, мұндай оқиғалар жалпыға ортақ нормаларға қайшы келетін акциялар ретінде бірауыздан айыпталуға тиістігін атап өтті.
БҰҰ Бас Ассамблеясы қасиетті кітаптарды қорлауға қатысты кез келген актілерді айыптайтын және мұндай әрекеттерді халықаралық құқық нормаларын бұзу деп танитын қаулы қабылдады.
Кейін Еуропа одағының Сыртқы істер және қауіпсіздік саясаты жөніндегі жоғарғы өкілі Жозеп Боррель сәрсенбі күні мұсылмандардың қасиетті кітабы Құранның өртелуіне қатысты мәлімдеме жасады.