Cirque du Soleil пандемияға байланысты банкротқа ұшырады
Бас кеңсесі Канаданың Монреаль қаласында орналасқан цирк 1 млрд АҚШ долларынан асатын қарызын жаба алмай отыр. «Соңғы айларда коронавирус пандемиясына байланысты цирктің барлық шоулары жабылып, ешқандай табыс түспеді», - дейді Cirque du Soleil Entertainment Group басшысы Даниэль Ламарр.
CNN мәліметінше , компания басшылығы соңғы 36 жыл бойы жұмыс істеп келе жатқан цирк пен оның қызметкерлерінің болашағын сақтап қалу үшін барын салып жатыр. Цирк жабылып қалмау үшін қызметкерлердің 95% немесе 3,5 мың адам жұмыстан босатылмақ. Қысқартылған қызметкерлерді қолдау үшін 15 млн доллар бөлінеді. Компанияның мәлімдеуінше, қысқарту – уақытша шара. Цирк шоулар мен гастрольдік сапарларды бастағаннан кейін олардың басым бөлігі қайта жұмысқа қабылданады. Сондай-ақ, компания дайындалған бизнес-жоспарға сәйкес қайта құрылымдауға 300 миллион салуды жоспарлап отыр.