«Цифрлық Қазақстан» аясында бос жұмыс орындары көбейген

АСТАНА. ҚазАқпарат - Өткен жылы аталған бағдарламаны жүзеге асыру барысында 785 мың бос жұмыс орны жарияланды, деп хабарлайды ҚазАқпарат тілшісі ҚР Еңбек және халықты әлеуметтік қорғау министрлігінің баспасөз қызметіне сілтеме жасап.

«2018 жылы «Цифрлық Қазақстан» бағдарламасын жүзеге асыру барысында 785 мың бос жұмыс орны жария етілді. Оның 351 мыңы enbek.kz порталында орналасса, қалған 433 мыңы халықты жұмыспен қамту орталығы арқылы жарияланды. Өткен жылы бағдарлама аясында 409 мың адам жұмыспен қамту орталығы арқылы еңбекпен қамтылды, ал 107 мың адам enbek.kz порталы арқылы жұмысқа орналасты», - деп жазылған министрліктің Фейсбук парақшасында.

Еңбекпен қамтуда саны жағынан көш бастап тұрған Ақтөбе, Алматы, Жамбыл және Қарағанды облыстары, одан бөлек республикалық маңызы бар қалалар.