Чемпиондар лигасы: «Бавария» Англияда «Челси» командасын ойсырата жеңді
Англияның «Челси» командасы өз алаңында Германияның «Бавария» командасын қабылдады. Екі клуб та жеңіске жету жолында тынбай тер төкті. Бірінші кезең олардың алма-кезек шабуылымен өрбіді. Десе де бір-бірінің қақпасынан саңылау таба алған жоқ.
Екінші кезеңнің 51, 53 минуттарында «Бавария» ойыншысы Серж Гнабри қос голдың авторы атанды. Ал ойынның 76-минутында оның команлас әріптесі Роберт Левандовски есепті ұлғайтты. «Бавария» 3:0 есебімен жеңіске жетті.
Италияның «Наполи» клубы Неаполь қаласында Испанияның «Барселона» командасымен шеберлік байқасты. Итальяндық футболшылар азулы қарсыласының ығына жығыла қойған жоқ. «Барселона» қақпасы маңында жиі бой көрсетті. Нәтижесінде 30-минутта «Наполи» ойыншысы Дрис Мертенс мергендік танытты. Бұдан кейін қос команда тарапынан есепті өзгертетін бірнеше мүмкіндік болған еді. Дегенмен бірінші кезеңде таблодағы есеп сол күйінше өзгеріссіз қалды. Екінші кезеңнің 57-минутында «Барселона» шабуылшысы Антуан Гризманн таразы басын теңестірді. Ойын 1:1 есебімен тең аяқталды.
Бүгінгі екі кездесудің де қарымта ойындары 18 наурызда болады.
Бір апта бұрын жарыстың аталған сатысындағы төрт кездесу өткізілді. Онда өз алаңында Германияның «Боруссия Дортмунды» Францияның ПСЖ клубын 2:1, Испанияның «Атлетико Мадриді» Англияның «Ливерпулін» 1:0, Италияның «Аталантасы» Испанияның «Валенсиясын» 4:1 есебімен жеңсе, Англияның «Тоттенхэм Хотспур» клубы Греманияның «Лейпцигіне» 0:1 есебімен есе жіберді.
Енді жарыстың аталмыш сатысында тағы да екі ойын өткізіледі. 27 ақпанда өз алаңында Испанияның «Реал Мадриді» Англияның «Манчестер Сити» клубын, Францияның «Лионы» Италияның «Ювентусын» қабылдайды.