Былтыр елімізде 367 мың жұмысшы зиянды ортада еңбек еткен

НҰР-СҰЛТАН. ҚазАқпарат – ҚР Еңбек және халықты әлеуметтік қорғау министрлігі Еңбек, әлеуметтік қорғау және көші-қон комитетінің төрағасы Ербол Нұрғалиев зиянды жұмыс орындары ең көп тіркелген өңірлерді атады, деп хабарлайды ҚазАқпарат тілшісі.

«Ресми статистика бойынша, 2020 жылы тексерілген кәсіпорындардағы 1,6 млн қызметкердің 367 мыңы (22%) зиянды еңбек жағдайларында еңбек еткен. Олардың ең көп саны Қарағанды (74 мың адам), Павлодар (46 мың адам), Шығыс Қазақстан (37 мың адам) және Маңғыстау облыстарында (32 мың адам) жұмыс істеді», - деді ол орталық коммуникациялар қызметінде өткен брифингіде.

Комитет басшысының мәліметі бойынша, тек тау-кен өндіру саласында ғана 120,8 мың адам адам зиянды жағдайда жұмыс істеген.

«Шу мен дірілдің жоғары деңгейі жағдайында әрбір екінші жұмысшы (46%), жоғары газды және шаңды аймақта әрбір үшінші жұмысшы (32%) еңбек еткен. 94 мың адам ауыр жұмысқа тартылған», - деді Ербол Нұрғалиев.