«Бүркіт» әуе компаниясының Түркияға көмекке барған ұшқыштары марапатталды

None
АСТАНА. ҚазАқпарат – Бүгін «Бүркіт» әуе компаниясының Түркияға құтқарушылар мен гуманитарлық жүк жеткізген ұшқыштары марапатталды, деп хабарлайды ҚазАқпарат тілшісі.



Салтанатты іс-шараға Президент Іс басқарушысының орынбасары Сергей Хорошун арнайы қатысып, марапат иелерін құттықтады.

«Бүркіт» әуе компаниясының қызметкерлері Түркияда болған жер сілкінісі салдарын жоюға белсене қатысып, гуманитарлық жүкті, Төтенше жағдайлар министрлігінің іздеу-құтқару топтары мен техникаларын жеткізді», - деді Сергей Хорошун.



Президент Іс басқарушысының орынбасары Мемлекет басшысының Жарлығына сәйкес, Ил-76 ұшағының штурман-нұсқаушысы Нұржан Оспанқұлов пен штурман Николай Гудеевке «Ерен еңбегі үшін» медалін табыстады.


Сонымен қатар әуе компаниясының тағы 15 қызметкері Президенттің Алғыс хатымен марапатталды.

«ИЛ-76 ұшағының командирі мен экипажы мемлекетіміздің, Президентіміздің қойған мақсат-міндеттерін, тапсырмаларын толықтай орындады. Төтенше жағдайлар министрлігінің құтқарушылары мен арнаулы техникаларын, гуманитарлық жүктерді түрік мемлекетіне уақытылы жеткіздік. ИЛ-76 ұшағының экипажы Мемлекет басшысы тапсырмаларын орындауға әр уақытта дайын», - деді ИЛ-76 ұшағының бортоператор-нұсқаушысы Талғат Мұратов.


Ал Ил-76 ұшағының штурманы Николай Гудеев Түркияға 5 рейс орындағанын айтады.«Экипаж жедел арада жасақталды. Жалпы 5 рет ұштық. Үкіметімізге үлкен рақметімізді айтамыз. Бәрі жедел түрде ұйымдастырылды», - деді Николай Гудеев.




Айта кетейік, Н.Оспанқұлов пен Н.Гудеев «Бүркіт» әуе компаниясында 2004 жылдан бері еңбек етеді.Тәжірибелі мамандар өздерінің кәсіби біліктілігімен, жауаптылығымен, адами қасиеттерімен басқа әріптестеріне үлгі болып жүр.




Соңғы жаңалықтар