Бүкіләлемдік банк: Қазақстан Doing business рейтингінде қалай көтерілді
Қазақстан былтырғымен салыстырғанда биыл аталған рейтингте 36-орыннан 28-ші орынға көтерілді.
Бұл рейтингті жасайтын Бүкіләлемдік банк өкілдері бүгін Алматыда видеоконференция барысында Қазақстанның 8 сатыға көтерілу себептерін түсіндірді.
Банктің ғаламдық көрсеткіштер мен талдау департаментінің сарапшысы Парвина Рахимованың айтуынша, Қазақстан үкіметі 2017-2018 жылдардағы бизнесті жүргізуді жеңілдету мақсатында қосымша құн салығын төлеуші кәсіпкер ретінде тіркелу уақытын 9 күннен 5 күнге қысқартқан.
Халықаралық сауда саласында «Астана-1» кеден декларациясының электронды жүйесі енгізілді. Бұл өз кезегінде экспорт кеден құжаттарының рәсімделуінің уақытын азайтты.
Сонымен қатар, сот өндірісі жүйес сапасының индексі 14-тен 16-ға артты.
«Қазақстанның рейтингі 10 индикатор миноритарлық инвесторларды қорғау (1-орын), меншікті тіркеу (18-орын), кәсіпорынды тіркеу (36-орын) бойынша алға жылжыды. Келсімшарттардың орындалуы саласында (4-орын), құрылысқа рұқсат алу (35-орын), салық салу (56-орын), электр жүйесіне қосылу (76-орын), халықаралық сауда (103-орын), несие алу (60-орын) саласында орташа көрсеткіштер қалыптасты. Қазақстанға әлі де несие алу, халықаралық сауда, төлем қабілеттілігін талап ету тағы басқа салалар бойынша позициясын жақсарту үшін көп жұмыс жасау керек», - деді Парвина Рахимова.
Аталған рейтинг елдегі бизнес субьектілерінің сауалнамасының нәтижесінде жасалады.
Олар айтқан ақпарат қосымша тексеріледі. Сондай-ақ мемлекеттік органдардың берген мәліметтерімен салыстырылады.