10:50, 01 Қазан 2022 | GMT +6
Бүгін павлодарлық қариялар трамвайда тегін жүреді
ПАВЛОДАР. ҚазАқпарат - Бүгінгі қарттар күнінде егде жастағы өңір тұрғындарына осындай мүмкіндік берілді, деп хабарлайды ҚазАқпарат Pavlodarnews ресурсына сілтеме жасап.
Павлодар қаласы трамвай басқармасының мәлімдеуінше, трамвай қызметкерлері жолаушыларға тосынсый жасаған.
- 1 қазан - халықаралық қарттар күні қарсаңында Д.Махмудов атындағы Павлодар қаласының трамвай басқармасы жасы үлкен жолаушыларымызға сыйлық тарту етті. Сіздерге бақытты да ұзақ ғұмыр, мықты денсаулық тілейміз, - делінген хабарламада.
Айта кетейік, 1 қазан күні елімізде қарттар күні аталып өтеді. Халықаралық қарттар күні - 1990 жылы 14 желтоқсанда БҰҰ Бас ассамблеясында бекітіліп, жарияланды.
Оның аясында қарттарға құрмет көрсетіліп, түрлі форматтағы іс-шаралар ұйымдастырылады.