Бүгін - Кедейшілікке қарсы күрес күні: БҰҰ балаларға жағдай жасауға шақырды

НҰР-СҰЛТАН. ҚазАқпарат – Біріккен Ұлттар Ұйымы әлем мемлекеттерін балаларға жайлы өмір жағдайын жасауға шақырды. Бұл туралы БҰҰ жаңалықтар сайтында жарияланды, деп хабарлайды ҚазАқпарат.

Бүгін - Кедейлікті жою жолындағы халықаралық күрес күні. БҰҰ Даму бағдарламасының деректеріне сүйенсек, бүгінде шамамен 1,3 млрд адам жоқшылықтың тауқіметін тартып отыр. Әсіресе кедей отбасылардағы балалардың жағдайы жанға батады.

Кедейшілікке қарсы күрес күнінің биылғы тақырыбы – балалар. 30 жыл бұрын қабылданған Бала құқықтары туралы конвенцияда әр баланың ақыл-ой, дене жағынан, рухани, моральдық және әлеуметтік дамуына кепілдік беріледі. Бірақ әлемдегі балалардың барлығы бірдей жайлы өмір сүріп отырған жоқ.

«Балалардың жоқшылық қамытын киюі ұрпақтан-ұрпаққа жалғасып келе жатқаны шындық. Егер біз алдымызға ауқымды міндеттер қоймасақ, бүгінгі балалар ертең климат өзгеруінің зор салдарын көреді», - деп мәлімдеді БҰҰ Бас хатшысы Антониу Гутерриш.

Оның айтуынша, қақтығыс аймақтарында да, киберкеңістікте де, мәжбүрлі түрде еңбекке жегу және жыныстық пайдалануға байланысты жағдайларда да кішкентай қыздар аса зардап шегіп келеді. «Бірақ өзгерістердің қозғаушы күші – солар ғой», - дейді БҰҰ басшысы.

А. Гутиерриш қыздарды оқытуға күш салу – оларды кедейлік пен қауіп-қатерден құтқару үшін аса маңызды екендігін айтады.

БҰҰ Бас хатшысы әлем мемлекеттерін отбасы мүдделеріне, атап айтқанда ата-аналардың бала күтіміне дұрыс уақыт бөлуіне бағытталған саясат жүргізуге шақырады.