Бүгін 3 млн 700 мыңнан астам оқушы оқу жылын аяқтады

None
АСТАНА. ҚазАқпарат – Қазақстанда 172 мың түлек 11 сынып бітірді, оның 6 мың 800-і «Алтын белгі» үміткерлері. Ал 9-шы сыныпты 288 мыңнан астам түлек тәмамадады, деп хабарлайды ҚазАқпарат ҚР Оқу-ағарту министрлігінің Telegram каналына сілтеме жасап.

Ведомство таратқан мәліметтерге қарағанда, 1-10 сыныптар аралығындағы балалардың 85,3% жазғы демалыс және сауықтырумен қамтылатын болады. Бұл – ел бойынша 2 млн 800 мың бала. Оның ішінде 500 мың жекелеген санаттағы отбасы балалары бар.

Балалар демалысын ұйымдастыру үшін 218 қала сыртындағы және 10 200 мектеп жанындағы, профильдік, шатырлы лагерлер жұмыс істейтін болады.

Сонымен қатар «Этноауыл», «Жаздық жолдама» жобалары іске асырылады. Жетекші университеттер жанындағы жазғы және олимпиадалық резерв мектептері жұмыс істейді.

Жазғы демалыста 1 млн 400 мың бала үшін қосымша білім беру мекемелеріндегі секциялар мен үйірмелер ашылады. Ғылыми-техникалық, музыкалық, көркемдік, экологиялық, туристік және басқа да бағыттардағы 11 мың үйірме балаларды қабылдайды.

Сондай-ақ балалар «Жасыл ел» бағдарламасы шеңберінде көгалдандырумен шұғылданады, еліміздің киелі жерлеріне саяхаттап, спорттық жаттықтыру жиындарында шынығады, тілдік курстарға қатыса алады.


Соңғы жаңалықтар