Валюта бағамдары:
    usd/kzt 478.01 eur/kzt 488.81

    rub/kzt 7.91 cny/kzt 70.76
Ауа райы:
Нұр-Сұлтан: 1 °С
Алматы: 15 °С

Бомба туралы жалған хабар беретіндер арасында жұмыссыздар басым

2022 жылғы 13 маусым 12:02

НҰР-СҰЛТАН. ҚазАқпарат – Жарылғыш зат туралы жалған ақпарат тарататындар арасында жұмыссыздар басым. Бұл туралы ҚР ІІМ Экстремизмге қарсы іс-қимыл департаменті басқарма бастығының орынбасары Спартак Қабденов айтты, деп хабарлайды ҚазАқпарат тілшісі.

«Жарылғыш зат қойылғаны туралы жалған ақпарат жолдау - жай ғана бұзақылық емес, қылмыс болып саналады. Өйткені, жалған хабар таратқан адам ақпаратты жолдағаннан кейін қылмыс жасалған деп саналады. Телефонмен хабарлайтын бұзақылықтың басым бөлігі мас күйде жасалады. Мысалы, 2022 жылдың 5 айында істері сотқа жолданған 12 адамның 11-і қылмысты мас күйінде жасаған. Сондай-ақ қылмыстың 80 пайыздан астамын, яғни, ашылған 19 қылмыстың 15-ін жұмысы жоқтар жасаған», - деді ол министрліктің баспасөз алаңында өткен брифингте.

Оның атап өтуінше, соңғы уақытта әлеуметтік желілердің, мессенджерлердің, басқа да ақпараттық технологияның дамуына байланысты жалған хабардың интернет арқылы жолдануы күрт өскен.

«Осы жылдың 5 айында электрондық хабарлама жолдауға қатысты 35 қылмыстық іс қозғалды. Оның барлығы адам көп жиналатын әуежай, темір жол вокзалы, мемлекеттік орган ғимараттары сынды нысандардың электронды поштасына жолданған», - деді Спартак Қабденов.


Автор:

Марлан Жиембай

Новости по теме
Серіктестер жаңалықтары