Бомба болуы мүмкін: Өскеменде полиция әуежайды қоршауға алды

ӨСКЕМЕН. ҚазАқпарат – Өскемен қаласында полиция қызметкерлері күдік тудырған сөмкеге байланысты әуежайды қоршауға алды, деп хабарлайды ҚазАқпарат тілшісі.

ШҚО Полиция департаменті баспасөз қызметінің мәліметіне сүйенсек, 20 наурызда Өскеменде күдік тудырған сөмкеге орай әуежай қоршауға алынды.

«Қалалық ПБ полиция қызметкерлері әуежай тұрағын патрульдеу барысында күдікті қара сөмкені тапқан. Сигналды алғаннан кейін мамандандырылған қызметтер дереу оқиға орнына барды. Тексеру нәтижелері бойынша қандай да бір қауіпті заттар табылған жоқ», - делінген ақпаратта.

Еске салсақ, ақпан айында қаладағы мектептерде бомба қойылғаны туралы бірнеше күн қатарынан хабар түскенін хабарлаған едік.

Алайда бұл хабарлардың барлығы жалған болып шықты.