Болашақ саясаттанушы: Сайлау - мемлекетті басқару ісіне қатысудың бірден-бір жолы

ҚАРАҒАНДЫ. ҚазАқпарат – Пандемияға сайлаудың өтуіне кедергі бола ма деген қауіп сейіліп, дауыс беру қарқынды өтуде. Әрбір қазақстандық азамат мемлекетті басқару ісіне қатысып, сайлауда дауыс бергені жөн, дейді болашақ саясаткер Елдос Жұмағұлов.

Бүгін Л.Н. Гумилев атындағы ЕҰУ 3-курс докторанты Елдос Жұмағұлов конституциялық құқығын пайдаланып, сайлауда дауыс берді.

Болашақ саясаттанушы қарағандылық жерлестерін азаматтық парызын орындауға шақырды.

«Әрине, сайлауға қатысу, қатыспау - әркімнің өз еркі. Бірақ еліміздің болашағына бейжай қарамайтын азамат өз борышына немқұрайды қарамағаны жөн. Сайлау мемлекетті басқару ісіне қатысудың бірден бір жолы.

Бұл сайлаудың ерекшеліктеріне атап өтетін болсақ, ең біріншіден, пандемияға қатысты карантин шектеулері аясында өткізіліп отыр, эпидемиологиялық жағдайдың асқынуына орай сайлауды өткізуге кедергі бола ма деген қауіп болған.

Жағдайдың біршама тұрақтануы саяси науқанды уақытында өткізуге мүмкіндік берді.

Екіншіден, сайлау туралы заңнамаға енгізілген өзгерістерге сәйкес, жергілікті мәслихат сайлауы жаңа пропорционалдық жүйе бойынша өтуде», - дейді Елдос Жұмағұлов.