Бокстан Азия чемпионаты: Қазақстан қоржынына жетінші алтын медаль түсті

НҰР-СҰЛТАН. ҚазАқпарат - Бокстан Біріккен Араб әмірлігінің Дубай қаласында қыздар арасында өтіп жатқан Азия біріншілігінде Қазақстан қоржынына жетінші алтын медаль түсті деп хабарлайды ҚазАқпарат тілшісі.

Бұл медальға Фариза Жолтай (81 келі) ие болды. Ол өзбекстандық Сохиба Рузметовамен қолғап түйістірді. Аталған жекпе-жекте қазақстандық боксшы сенімді ойын көрсетті. Нәтижесінде төрешілер жеңісті бірауыздан Фаризаға берді.

Бұдан бұрын қазақстандық құрама сапынан Алуа Балқыбекова (48 келі), Назым Қызайбай (51 келі), Дина Жоламан (54 келі), Римма Волосенко (60 келі), Милана Сафронова (64 келі) және Валентина Хальзова (69 келі) алтыннан алқа таққан еді.

Ал Валентина Кухта (57 келі) күміс жүлдені қанағат тұтты.

Осы уақытта қазақстандық құрама сапынан Ләззат Күнгейбаева (81 келіден жоғары) кезекті жекпе-жегін үндістандық Анупамамен өткізуде.