Бокстан Азия чемпионаты: Финалға шыққан спортшылар жөнінен Қазақстан екінші орында тұр

АСТАНА. ҚазАқпарат - Таиланд астанасы Бангкок қаласында өтіп жатқан 22 жасқа дейінгі жастар арасында бокстан Азия чемпионатында Қазақстан құрамасынан алты спортшы финалға шықты. Бұл жөнінен ел құрамасы екінші орында тұр, деп хабарлайды ҚазАқпарат тілшісі.

Ел құрамасынан Санжар Ташкенбай (48 келі), Нұрсұлтан Алтынбек (54 келі), Махмуд Сабырхан (57 келі), Абзал Серік (67 келі), Сабыржан Аққалыков (71 келі) және Диас Молжігітов (75 келі) чемпиондық атаққа таласады.

Финалға шыққан спортшылар саны бойынша он боксшымен Өзбекстан көш бастап тұр.

Ал үшінші орындағы Таиланд құрамасы сапында үш былғары қолғап шебері алтын медаль үшін сайысқа түседі. Ал Филиппин мен Қытайда екі, Моңғолия, Индонезия және Камбоджа құрамалары бір-бірден боксшысын финалға қосады.

Еске салсақ, бұдан бұрын бокстан жастар арасында Азия чемпионатында үш боксшы қола жүлдегер атанғанын хабарлаған едік.

Фото: prosports.kz