Бокстан ӘЧ: Қанша қазақстандық ½ финалға өтті және қарсыластары кім

ТАШКЕНТ. ҚазАқпарат – Өзбекстан астанасы Ташкент қаласында өтіп жатқан әлем чемпионатының жартылай финалына Қазақстан құрамасынан 5 боксшы шықты, деп хабарлайды ҚазАқпарат тілшісі.

½ кезеңге жолдама алған боксшылар жөнінен ел құрамасы төртінші орында тұр. Көш басында 9 боксшысы жартылай финалға шыққан Өзбекстан құрамасы орналасқан. Одан кейінгі орындардағы Куба мен Ресейдің еншісінде 6 спортшыдан бар.

Ал Грузия, Үндістан, Франция және Испания 3 боксшыға үміт артса, Армения, Моңғолия, Бразилия және Әзербайжан екі, Қырғызстан, Иордания, Тәжікстан, Қытай, Мексика және Италия бір-бір спортшысын бәсекеге қосады.

Қазақстандық боксшылардың жартылай финалдағы қарсыластары

Ел құрамасынан шаршы алаңға бірінші болып шығатын Санжар Тәшкенбай (48 келі) таиландтық Вуттичай Юрачаймен қолғап түйістіреді. Қарсыласы 2021 жылғы әлем чемпионатының күміс жүлдегері.

Ал Махмуд Сабырхан (54 келі) финалға берілетін жолдаманы кубалық Йосвани Вейтимен сарапқа салады. Кубалық спортшы 2017 жылы әлем чемпионы болса, 2015 жылы – күміс, 2013 жылы қола алды.

Сондай-ақ Дулат Бекбауов (67 келі) 2021 жылы әлем чемпионатында «қола» алған грузин Лаша Гурулимен жұдырықтасады.

Ұлттық құрама капитаны Асланбек Шымбергенов (71 келі) үндістандық Нишант Девомен кездессе, Нұрбек Оралбай (80 келі) 2020 жылғы Олимпиадада қола алған ресейлік Имам Хатаевпен шаршы алаңға шығады.

Жартылай финал ойындары 12 мамырда өтсе, финал 13 және 14 мамыр күндеріне белгіленген.

Еске салсақ, 10 мамыр күнгі кешкі сессияда Дулат Бекбауов (67 келі), Махмуд Сабырхан, Санжар Ташкенбай бокстан әлем чемпионатының жартылай финалына өтті.
Асланбек Шымбергенов (71 келі) пен Нұрбек Оралбай (80 келі) да жарысты жалғастыруға мүмкіндік алды.

Күндізгі сессияда Серік Теміржанов (57 келі) кубалық Сайдел Орта Родригеске есе жіберіп қойса, Қамшыбек Қоңқабаев (92 келіден жоғары) та жарыс жолынан шығып қалды.