Bloodhound LSR автомобилі сағатына 790 шақырым жылдамдықты бағындырды

НҰР-СҰЛТАН. ҚазАқпарат - ОАР-да Калахари шөліндегі құрғап қалған Хакскин-Пан көлінде дыбыстан да жылдам Bloodhound LSR автомобилі сағатына 790 шақырым жылдамдықпен жүйткіп, өзінің рекордын жаңартты, деп хабарлайды ҚазАқпарат ВВС-ге сілтеме жасап.

«EJ200 қозғалтқышы машинаны 790 км/с дейін жеткізді. Бүгінгі басты мақсатымыз - аэродинамикалық қарсылық пен тежеу параметрлерін өлшеу»,-деген пилот Энди Гриннің сөзін келтіреді ВВС.

Әр айналым сайын Грин жылдамдықты бұрынғысынан көбірек арттырған.

Енді Bloodhound LSR автомобилін шығарушылар қозғалтқышты ракетамен жабдықтап, 2020 жылғы жазда әлемдік рекордты жаңартудан үмітті. Оны да Грин басқаратын болады.

Британдық мамандар құрастырған Bloodhound LSR автобобилінің ұзындығы 14 метр, салмағы 7 тонна.