БҚО: Полиция қызметкерлеріне 10 «Нива», бір «Автоураган» автокөлігінің кілті табыс етілді (ФОТО)

ОРАЛ. ҚазАқпарат - Бүгін Тәуелсіздік мерекесіне орай БҚО ішкі істер департаментінде салтанатты жиын өтіп, Жеңіс алаңында тәртіп сақшылары сап түзеп, шеру жасады.

Полиция қызметкерлерін Тәуелсіздік мейрамымен облыс әкімінің орынбасары Бақтияр Мәкен құттықтап, кілең ақ түсті 10 «Нива» көлігі және «Автоураган» заманауи автокешенінің кілттерін табыс етті. Сөйтіп енді өңірдегі әмбебап сақшылар қос бірдей «Автоураган» кешенімен жұмыс жасайтын болады.

Шарада ҚР Ішкі істер министрі, полиция генерал-майоры Қ.Қасымовтың құттықтау хаты мен марапаттау туралы бұйрығы оқылып, үздік қызметкерлерге мерзімінен бұрын офицерлік шендер, медальдар, грамоталар, алғысхаттар берілді. Ал ішкі істер департаменті бастығының бұйрығымен барлығы 1050 полиция қызметкері марапатталды.

Сапта тұрған 23 жас қызметкер әріптестері мен ардагерлердің алдында халқына және мемлекетке адал қызмет етуге ант берді.

Жиын Орал полициясы гарнизонының салтанатты шеруімен аяқталды.