01:38, 15 Ақпан 2021 | GMT +6
БҚО-да жыл басынан бері 381 оқушыдан коронавирус анықталған
НҰР-СҰЛТАН. ҚазАқпарат - Оқу жылы басталғалы Батыс Қазақстан облысында мектеп оқушылары арасында COVID-19-дың 381 жағдайы тіркелген. Оның 187-сі оффлайн форматта оқитын оқушылар болса, 194 жағдай қашықтан оқитын оқушылар арасында тіркелген, деп хабарлайды ҚазАқпарат Ведомствоаралық комиссияның баспасөз қызметіне сілтеме жасап.
3 тоқсан басталғалы (11 қаңтардан бастап) облыс мектептерінің оқушылары арасында 167 КВИ жұқтыру фактілері тіркелген. 89 оқушы оффлайн форматта, 78-ы қашықтан оқитын оқушылар арасында анықталған.
2021 жылдың басынан Батыс Қазақстан облысының аумағындағы мемлекеттік шекара бекеттері арқылы 34 899 адам өткен. 6 955 жолаушының 867-сінде COVID-19-ға теріс нәтижесі көрсетілген анықтама болмаған. Аталған жолаушылар 3 тәулікке карантиндік стационарға орналастырылып, ПТР әдісімен COVID-19 тест алынған, 4 жолаушының тест қорытындысы оң нәтиже көрсеткен.
Аталған аралықта БҚО аумағы арқылы екі жақты қатынаста халықаралық жүк тасымалдарын жүзеге асыратын 18 265 жүргізуші өткен. 5 850 жүргізушінің арнайы анықтамасы болмауына байланысты ПТР әдісімен COVID-19 тест алынып, 7 жүргізушінің КВИ жұқтырғаны анықталған.