БҚО-да полиция қызметкері жол апатынан қаза тапты

None
None
ОРАЛ. ҚазАқпарат – Батыс Қазақстан облысында полиция қызметкері жол апатынан қаза тапты, деп хабарлайды ҚазАқпарат тілшісі.

БҚО полиция департаментінің ресми өкілі Болатбек Белгібековтің мәлім еткеніндей, оқиға бүгін Орал-Тасқала жолында болды.

Орал қаласы полиция басқармасының қызметкері Мержан Бисенғалиев Тасқала ауданы Айнабұлақ ауылы тұсында өзінің Chevrolet Cobalt автокөлігімен аударылып қалды.

Көлікте ол жалғыз болған. Алған жарақаты салдарынан оқиға орнында көз жұмды.

Осы дерек Тасқала аудандық полиция бөлімінде сотқа дейінгі тергеп-тексерудің бірыңғай тізіліміне тіркеліп, ҚР ҚК 345-бабы 3-бөліміне сәйкес тергеу амалдары жүргізілуде.

«Марқұмның соңында жары, кішкентай қызы қалды. Мержан ішкі істер органдарына 2002 жылы орналасып, қызмет бабында өзін жақсы қырынан көрсетті. Жауапты да сауатты қызметкерлердің бірі еді, әрдайым жастарға үлгі бола білді», деді ҚазАқпарат тілшісіне Б.Белгібеков.

Еске сала кетейік, бұдан бұрын БҚО-да түйіскен екі жүк көлігі өртеніп, 2 адам мен 39 жылқының жанып кеткенін, Оралда септикке түсіп кеткен 3 жасар баланың жансақтау бөлімінде жатқанын жазған болатынбыз.




Соңғы жаңалықтар