БҚО-да білім бөлімінің бухгалтері 31 млн теңге бюджет қаржысын жымқырған

ОРАЛ. ҚазАқпарат – Батыс Қазақстан облысында 31 млн теңге бюджет қаржысын жымқырған бухгалтер сотталды, деп хабарлайды ҚазАқпарат тілшісі.

БҚО сотының баспасөз қызметі мәлім еткендей, Сырым аудандық сотының үкімімен аудандық білім бөлімінің бухгалтері Ақкенже Кушаева ҚР ҚК 189-бабы 4-бөлігі 2-тармағына сәйкес айыпты деп танылды.

А.Кушаева мүлкін тәркілеусіз 7 жыл 6 ай мерзімге бас бостандығынан айыру жазасын қауіпсіздігі орташа қылмыстық-атқару жүйесі мекемесінде өтеуге үкім кесілді.

Кішкентай балалары болғандықтан, ҚР ҚК 74-бабы 1-бөлімі негізінде тағайындалған жазаны өтеу мерзімі бес жылға кейінге қалды.

Ол сондай-ақ мемлекеттік мекемелерде, квазимемлекеттік сектор субъектілерінде, коммерциялық және коммерциялық емес ұйымдарда қаржылық қызметпен және материалдық жауапкершілікпен байланысты лауазымдарды атқару құқығынан 10 жылға айырылды.

Сотта анықталғанындай, А.Кушаева бөлім басшысы мен бас есепшінің электронды санды қолын пайдалана отырып, қаржыны туыстары мен әріптестерінің есепшотына аударған.

Олар ақшаны Кушаеваға қайта аударған немесе қолма-қол берген. Осындай жолмен барлығы 31 млн теңге жымқырылған.

Сот үкімі күшіне енген жоқ.

Еске сала кетейік, бұдан бұрын әлеуметтік желіде арандатушылық пікір жазған Орал тұрғынына қатысты қылмыстық іс қозғалғанын жазған болатынбыз.