БҚО-да Ата Заң мерекесіне орай 626 сақшы марапатталды

ОРАЛ. ҚазАқпарат - Қазақстан Конституциясы күніне орай батысқазақстандық сақшылар сапқа тұрып, салтанатты шеру жасады.

БҚО ішкі істер департаментінің баспасөз қызметінен түскен мәліметке қарағанда, алдымен ҚР Ішкі істер министрі, полиция генерал-полковнигі Қ.Қасымовтың құттықтау жеделхаты мен сала үздіктерін марапаттау туралы бұйрығы оқылды.

БҚО ІІД бастығы, полиция генерал-майоры Мақсұтхан Әбіләзімов министрдің атынан төсбелгілер, грамоталар мен алғысхаттар табыс етті. Сонымен қатар Рио олимпиадасының қола жүлдегері, полиция лейтенанты Екатерина Ларионованы осынау табысымен құттықтап, спортшыға «Қазақстан полициясына - 20 жыл» және «Динамо» қоғамына - 90 жыл» медальдары мен ақшалай сыйлықты тапсырды. Палуанның әкесі әрі жеке бапкері Алексей Ларионов департамент басшылығы мен жеке құрамға, әсіресе, қызын ұзақ уақыт бойы жаттықтырған жедел қимылдайтын арнайы жасақ инспекторы Әсет Ерекешевке алғысын білдірді.

Шара барысында Ішкі істер министрінің және департамент бастығының бұйрығымен барлығы 626 полиция қызметкері марапатталды. 33 жас тәртіп сақшысы Қазақстан халқына және еліне адал қызмет етуге салтанатты түрде ант берді.