18:00, 10 Маусым 2013 | GMT +6
«Бизнестің жол картасы-2020» бағдарламасында жобаларды қаржыландыру ставкасы 7 пайызды құрайды
АСТАНА. 10 маусым. ҚазАқпарат - «Бизнестің жол картасы-2020» бағдарламасы аясында жобаларды қаржыландыру ставкасы 7 пайызбен бекітілді. Бүгін брифингте ҚР Өңірлік даму министрлігі Кәсіпкерлікті дамыту комитетінің төрайымы Ғалия Жолдыбаева осылай мәлім етті.
Комитет төрайымының айтуына қарағанда, қазіргі күні «Бизнестің жол картасы-2020» бағдарламасында несие сыйақысы ставкасының ең жоғары көрсеткіші 14 пайызды құрайды. Оның 7 пайызын мемлекет өтесе, қалған 7 пайызды кәсіпкер өтейді. «Бұған дейін, жоба бойынша қаржыландыру көрсеткіші 12-13 пайыз болса, мемлекет міндетті түрде 7 пайызын өтейтін де, айырмасы кәсіпкерге жүктелетін. Қазір бұл басқаша, кәсіпкер міндетті түрде 7 пайызын төлеп, мемлекет қалғанын мойнына алады», - дейді Ғалия Жолдыбаева.
Оның айтуынша, бұл шара негізінен бір жоба бойынша бірнеше қаржыландыруға ие болудың алдын алуға бағытталады. Өйткені, дәл осылайша мемлекеттік қолдауға ие болған кәсіпкерлер соңғы уақытта көбейіп кеткен.