Біз алмаған әлі 5 жолдама бар - Ғалымбек Кенжебаев Бокстан Ұлттық құраманың бас бапкері

НҰР-СҰЛТАН. ҚазАқпарат – Бокстан Ұлттық құраманың бас бапкері Ғалымбек Кенжебаев Иорданияның Амман қаласында өтіп жатқан бокстан Олимпиадаға іріктеу турнирі туралы қысқаша пікірімен бөлісті, деп хабарлайды ҚазАқпарат тілшісі.

«Өздеріңіз білесіздер, соңғы өзгерістерге байланысты Олимпиадаға бұрынғыдай 10 салмақта емес, 8 салмақта барамыз. Дәл қазіргі көрсеткіш бойынша біз 8 лицензияның үшеуіне иелік еттік. Алда әлі 5 жолдама бар. Сондықтан, 3 лицензияға бола қуануға әлі ерте. Жоспар бойынша бұл Азиялық іріктеу турнирінен кемінде 6 Олимпиада жолдамасын алып қайтуды мақсат еткенбіз. Жалпы, «арық айтып семіз шыққанды» жақсы көреміз ғой. Мақсат орындалды деп айта алмаймыз. Жарыс аяқталған жоқ, әлі де жолдамадан үміттіміз», - деді бас бапкер ҚазАқпарат тілшісіне әлеуметтік желі арқылы жауап беріп.

Естеріңізге сала кетейік, қазақ боксшылары бүгін Токио Олимпиадасына үш жолдама жеңіп алды. 69 келі салмақта Абылайхан Жүсіпов , 81 келі салмақта Бекзат Нұрдәулетов , 91 келі салмақта Василий Левит аталмыш турнирде қарсыласын жеңді.