Биылғы жарты жылда 21 есірткі зертханасы жойылды - министр

Фото: None
НҰР-СҰЛТАН. ҚазАқпарат – Биылғы алты айда Ішкі істер министрлігі 21 есірткі зертханасын жойған. Бұл туралы ведомствоның жартыжылдық жұмысын қорытындылаған министр Марат Ахметжанов мәлім етті, деп хабарлайды ҚазАқпарат тілшісі.

«Биыл 3,5 мыңнан астам есірткі қылмысы анықталды. 3 тоннадан астам есірткі тәркіленді. Оның 84 келісі – синтетикалық есірткі. Сонымен қатар, 21 есірткі зертханасы жойылып, үш ұйымдасқан қылмыстық топтың жолы кесілді», - деп атқарылған жұмыстардың нәтижесіне тоқталды ведомство басшысы.

Бұдан бөлек, министр 6 айда тіркелген тұрмыстық зорлық-зомбылық фактілеріне тоқталды.

«Жыл басынан бері полицияға тұрмыстық зорлық туралы 70 мың хабарлама түсті. 43 мың жағдайда шақырушы арыз беруден бас тартқан. Бірі жәбірлеушімен татуласса, енді бірі қайталанатын қауіптен қорқады. Бұл жерде тәртіп сақшысының өкілеттігі шектеулі. Арыз болмаса, заң бұзушы жауапқа тартылмайды. Сондықтан, қоғамда тұрмыста зомбылық көрсеткендерді қылмыстық жауапқа тарту керек деген ұсыныс та көбейді. Осыған орай, тұрмыстық қылмысқа қатысты заңнамаға түзету енгізіп, әкімшілік қамауға алу мерзімін ұлғайтып, ескерту орнына қоғамдық жұмысқа тарту керек», - деді Марат Ахметжанов.

Еске сала кетейік, бұған дейін тұрмыстық зорлық-зомбылық көргендердің 63 пайызы арыз жазудан бас тартатынын хабарлаған едік.

Бұдан бөлек, Ішкі істер министрінің еліміздегі ұрлық көп жасалатын үш өңір туралы айтқанын жазған болатынбыз .


Соңғы жаңалықтар