Биылғы 11 айда 724 мыңнан астам адам атаулы әлеуметтік көмек алды

АСТАНА. ҚазАқпарат – 1 желтоқсандағы жағдай бойынша 140,6 мың отбасындағы 724,1 мың адамға атаулы әлеуметтік көмек тағайындалды. Биыл осы мақсатқа бюджеттен 59,4 млрд теңге бөлінді. Бұл туралы ҚазАқпарат Еңбек және халықты әлеуметтік қорғау министрлігінің баспасөз қызметіне сілтеме жасап хабарлайды.

АӘК отбасының әрбір мүшесіне жан басына шаққандағы орташа табысы өңірлік ең төменгі күнкөріс деңгейінің 70%-ынан төмен азаматтарға тағайындалады.

АӘК көрсетудің жаңа тетігін іске асыру шеңберінде еліміздің барлық өңірінде табысы аз отбасылардың мектеп жасына дейінгі балалары кепілдік берілген әлеуметтік топтамамен қамтамасыз етілді. 1 желтоқсанда АӘК алушылар қатарындағы 1 жастан 6 жасқа дейінгі 191,1 мың балаға азық-түлік және тұрмыстық химия жиынтығы түрінде әлеуметтік топтама тағайындалды.

Азаматтардың әлеуметтік топтаманы заттай форматтан ақшалай форматқа ауыстыру туралы ұсыныстарын ескере отырып, 2023 жылдан бастап мектеп жасына дейінгі балалар үшін кепілдендірілген әлеуметтік топтаманы монетизациялау жүзеге асырылады. Азық-түлік пен тұрмыстық химия жиынтығының орнына әр балаға 1,5 АЕК мөлшерінде қосымша төлем белгіленеді. Осылайша, ата-аналарға балалардың жеке қажеттіліктеріне қарай өз бетінше азық-түлік сатып алу мүмкіндігі беріледі.