Биыл Жамбыл облысының 80 жылдық мерейтойы тойланады
Басқарма басшысының айтуынша, ағымдағы жылы Жамбыл облысының 80 жылдығымен қатар, Тұрар Рысқұловтың - 125, облыстық «Знамя труда» газетінің - 100, облыстық «Jambyl» телеарнасының - 30 жылдығы және «Бірлік түбі - береке» қоғамдық форумы ұйымдастырылмақ.
Брифингте Берік Уәлиұлы басқарманың өткен жылы атқарған жұмыстары жөнінде есеп берді. 2018 жылы Өңірлік коммуникациялар алаңында 165 брифинг өткізіп, республика бойынша үздік төрттіктен көрінгенін жеткізді. Сондай-ақ, өткен жылы облыс бойынша әкімдіктер мен басқармалардың баспасөз хатшыларына арнайы 3 оқыту семинары өткізіліп, барлық мекемелердің әлеуметтік желілердегі ресми парақшалары қайта жаңартылып, белсенді жұмыс жүргізуде.
«Ішкі саясат саласында азаматтық қоғам институттарымен тығыз қарым-қатынас орнату - ерекше маңызға ие. Өңірде 87 этностың өкілдері тұрады, 26 облыстық, бір қалалық және 47 аудандық этномәдени бірлестік жұмыс істейді. 854 үкіметтік емес ұйым тіркелген. Олардың 60 пайызы - облыс орталығында, 40,0 пайызы - аудандарда шоғырланған. Қазіргі таңда ҮЕҰ-дың 200-ден астамы белсенді жұмыс атқаруда. 6 саяси партияның филиалы істеп тұр. 2018 жылы облыс бойынша мемлекеттік әлеуметтік тапсырысқа 49 бюджеттік бағдарлама әкімшісі қаржы қарастырған», - деді Берік Уәлиұлы.
Айта кетейік, облыстық басқарманың ендігі негізгі жұмыстарының бірі - 1 қарашада бекітілген жаңа Елтаңбаны ауыстыруға бағытталмақ. Елтаңбаның жаңа үлгісіне жергілікті атқарушы органдар мен білім беру мекемелері 2020 жылдың 1 қаңтарына дейін, аумақтық департаменттер мен басқармалары 2020 жылдың 1 шілдесіне дейін ауыстыруға міндеттеліп отыр. Бұл орайда биыл жергілікті атқарушы органдар тарапынан 140,7 млн теңге қаражат қаралуда.