Биыл оныншы мәрте өткен «Бастау» кинофестивалінің жеңімпаздары белгілі болды

АЛМАТЫ. ҚазАқпарат - Алматыда X Халықаралық «Бастау» студенттік және дебюттік фильмдер кинофестивалінің жабылу салтанаты болып өтті. Фестивальдің қазылар алқасы кинокөрсетілімді қорытындылап, бірнеше номинация бойынша жеңімпаздарды анықтады.

Грузин режиссері Георгий Овашвили төрағалық еткен халықаралық қазылар алқасы Bastau DEBUTS бағдарламасында Боливиядан келген «Утама» картинасын үздік деп таныды.

Режиссер Алехандро Лоайс Гризидің фильмі кечуа ұлтының өкілі - қарт ерлі-зайыптылар жайында баяндайды.

Туынды ақпан айында әйгілі «Сандэнс» фестивалінде «Әлемдік кино» бағдарламасында Гран-при жеңіп алған және биыл Боливиядан «Шет тіліндегі үздік фильм» номинациясы бойынша «Оскар» сыйлығына ұсынылып отыр.

Үздік режиссерлік жұмысжүлдесі франциялық Али Черридің «Бөгет» картинасына берілді, ал актерлік номинацияларда индонезиялық Арсвенди Бенинг Свара («Өмірбаян» фильмі үшін) және чилилік Алин Куппенгейм («1976» фильмі үшін) жеңіске жетті.

Чили, Аргентина және Катардың бірлескен өнімі саналатын соңғы туынды («1976») қазылар алқасының арнайы сыйлығын да ұтып алды.

«Мұндай фестивальдер жастар үшін, алғашқы қадамдарын жасайтын студенттер үшін өте маңызды. Бұл өмірге деген және біздің ісімізге деген үлкен мотивация. Әсіресе дебют үшін өте маңызды – ал біздер, қазылар алқасы үшін бұл үлкен жауапкершілік. Сондықтан сіз жүлде алдыңыз ба, жоқ па, маңызды емес - фильмді түсіріп шығарғаныңыздың өзі - жеңіс. Сол үшін де күресуді тоқтаптаңыздар, сонда ғана жеңіске жетесіздер», - деді сахнадан халықаралық қазылар алқасының төрағасы Г. Овашвили.

Фестивальдің үздік қысқаметражды көркем фильмі номинациясында қазақстандық режиссер Роман Черниковтың «Нина» картинасы жеңіске жетті.

Сонымен бірге BASTAU SHORTS бағдарламасының қазылар алқасы келесі номинациялар бойынша жеңімпаздарды анықтады:

Үздік анимациялық қысқаметражды фильм - «Түн» Ахмад Салех, Палестина.

Үздік қысқаметражды деректі фильм – «Эвересті бағындыру» Бинода Адхикари, Непал.

Қазылар алқасының арнайы жүлдесі – Азамат Бүкешовтің «Жаздың ең ұзақ күні», Қазақстан.

Ерекше аталым – «Алиф.До-ре-ми» Алиджон Джалилов, Тәжікстан.

BASTAU DOCS бағдарламасында бас жүлде вьетнамдық Ха Ле Димнің «Тұман балалары» атты деректі картинасына өзектілігі мен бейнесі, әлеуметтік проблеманың көрінісі және өңірімізге жақындығы үшін берілді.

Сондай-ақ, қазылар алқасы израильдік Шир Ньюманның «Үнсіздік туралы айту» картинасын ұрпақтар арасындағы диалог мүмкіндіктері мен жеке оқиға арқылы халық тарихына деген көзқарастың мағыналылығы үшін және бангладештік Хумайра Билкистің дәстүрлі қоғамдағы жеке бостандық тарихын іздегені үшін «Мен анама ешқашан айтпайтын нәрсе» картинасын ерекше атап өтті.

Халықаралық студенттік қазылар алқасы режиссер Максим Севриновскийдің «Ротшильд скрипкасы» атты ресейлік картинаға фестивальдің ең үздік қысқаметражды фильм атағын берді.

Сонымен қатар, қырғызстандық Элдияр Мадаким түсірген «Сальвадор Дали» картинасы да ерекше аталып өтті.

Биыл фестивальде алғаш рет жұмыс істеген НЕТПАК қазылар алқасы өзбек режиссері Дилшодбек Усмоновтың «Монтаж» фильміне өз жүлдесін ұсынды, ал «Орталық Азияның үздік фильмі» ретінде «Бастау» фестивалі Президентінің арнайы жүлдесі режиссер Эрнест Әбдіжапаровтың «Әңгімеші» картинасына берілді.

Түркиядан келген режиссер Мерт Хармандар «2300 шақырым» картинасы үшін «Көрермен көзайымы» сыйлығын алды.

«Баршаңызға үлкен алғысымды айтқым келеді. Ең бастысы - кино мерекесі тойланды. Осы бес күнде біз фестивальдан барлық қиыншылықтарды, наразылықтарды, түсініспеушіліктерді жеңетін күш-қуат алдық», - деп қорытындылады фестиваль президенті С. Әзімов.

Биыл барлық Гран-прилерге ақшалай сыйлық берілді.

Естеріңізге сала кетсек, Х «Бастауда» 40-тан астам елден 60-қа жуық картина бәсекеге түсті. Бұл - фестивальдің өзіндік географиялық рекорды.