Биыл Көкаралды сақтауға бюджеттен 1,2 млрд теңге бөлінеді

АСТАНА. ҚазАқпарат – Премьер-Министрдің бірінші орынбасары Роман Скляр Мәжіліс депутаттарының сауалына берген жауабында Аралдағы экологиялық жағдайды оңалту жұмыстары туралы мәлімет берді, деп хабарлайды ҚазАқпарат тілшісі.

«2022 жылдан бастап Көкарал бөгетін сақтау және Сырдария өзенінің саласын қалпына келтіру жобасы қолға алынған. Жобаның жалпы құны – 4 млрд 582 млн теңге. 2022 жылы жобаны іске асыру үшін республикалық бюджеттен 500 млн теңге бөлініп, игерілді. Бұл қаражатқа арна түзетін және оны қоршайтын бөгеттер орнатылды. Сондай-ақ, «Қарашалаң-1», Тұщы», «Сарытерең» су ағызу каналдарын эксковатормен тереңдетіп аршу жұмыстары орындалды», - деп жазады Үкімет басшысының орынбасары.

Айтуынша, жоба биыл жалғасын табады. Оған бюджеттен тиісті қаржы да бөлініп отыр.

«2023-2025 жылдардың республикалық бюджеті аясында жобаны жалғастыру үшін 4 млрд 82 млн теңге қарастырылған. (2023 жылы – 1 млрд 200 млн теңге, 2024 жылы – 1 млрд 623 млн теңге және 2025 жылы – 1 млрд 258 млн теңге)», - дейді Роман Скляр.