Биыл Қарағандыны абаттандыруға 9,6 млрд теңге бөлінді

None
None
ҚАРАҒАНДЫ. ҚазАқпарат - Қарағандыда аулаларды абаттандыру, үйлердің қасбеттері мен шатырларын, кіреберіс жолдар мен орамішілік жолдарды жөндеу жұмыстары жүргізіліп жатыр.

Тапсырыстың көп болуының арқасында жергілікті құрылыс материалдары да сұранысқа ие. Өңіріміздің мердігерлері мен өндірушілері бар қарқынмен жұмыс істеп жатыр.

Биыл Қарағандыны абаттандыруға 9,6 млрд теңге бөлінді. Бұл қаржыға «Жұмыспен қамтудың жол картасы» аясында 421 аула, 46 орамішілік жолдар жөнделеді, 119 жаяу жүргіншілер жолдарына фальдар салынады және 269 балалар мен спорт алаңдары орнатылады. Сондай-ақ, бюджет есебінен 212 көпқабатты үйдің қасбеттері мен шатырлары ретке келтіріледі.

Бұл жұмыстарға шамамен 2 700 адам қатысады. Олардың жартысын халықты жұмыспен қамту орталығы арқылы жұмысқа орналастырады.

- «Жұмыспен қамтудың жол картасы» бағдарламасы аясында біз 12 аулаға балалар мен спорт кешендерін орнатуға байқауды жеңіп алдық. Бұл біздің компания үшін үлкен көмек. Карантин кезінде тоқтап қалған едік - жұмыс болған жоқ. Қазір біз бұрынғы жұмыс ретіне қайта көшеміз. Біздің компанияда жұмыс істейтін 20 адам бар, олардың бір бөлігін біз жұмыспен қамту орталығы арқылы тауып алдық. Олардың барлығы қазір жұмысқа жұмылдырылып, жалақы алады, - дейді «ЛидерСтройГруп» компаниясының өкілі Тимур Мыңбаев.

Қаланың басқа аулаларында алаңдарды «ККК ЛТД» компаниясы орнатады. Осы жазда мердігер 142 ойын және спорт кешенін жабдықтайды. Жұмыстарға кірісіп кеткен.

- Біз қарағандылық «КАРАТ» ЖШС өндірушісімен жұмыс істейміз. Олардың тренажерлары мен ойын кешендері мықты, және олардың бағасы біз үшін өте тиімді. Біз өз алаңдарымызға 2 жыл кепілдік береміз. Егер осы уақыт ішінде бір нәрсе сынса, біз барлығын өз есебімізден қалпына келтіруге міндеттіміз. Сондықтан, біз сенімді, тексерілген өндірушілермен жұмыс істегенді қалаймыз, олардың өнімдерінің сапасына сенімді болуымыз керек», - дейді мердігер компанияның өкілі Сымбат Тоғай.

Ауқымды абаттандырудың арқасында Қарағанды облысының зауыттары да өндіріс көлемін арттыруда. Осылайша жарықтандыру тіректерін, жарықдиодты шамдарды және электр монтаждау жабдықтарын өндіретін «ЛТО энергожүйесі» кәсіпорны 1 500 тірекке тапсырыс алды. Олардың барлығы аулаларда және жаяу жүргіншілер жолдарының бойына орнатылады.

«Карантин кезінде өндіріс көлемі төмендеді. Біз 40 қызметкерді демалысқа жіберуге мәжбүр болдық. Қазір әдеттегі жұмыс режиміне ораламыз, сондықтан барлық қызметкерлер қайтадан жұмыс орындарында», - дейді компанияның бас директоры Талғат Байғабілов.

Қарағанды қаласының жұмыспен қамту орталығында әлі де бірқатар бос жұмыс орны бар. Әртүрлі жұмыс істейтіндер, шатыр жабушылар, жиек және кесек тас төсеуші мамандар сұранысқа ие. Осындай жұмыскерлердің ең төменгі жалақысы 80 мың теңгені құрайды.


Соңғы жаңалықтар