Биыл халықтың жалпы өлім-жітімі 28 пайызға төмендеді – Ажар Ғиният

2022 жылғы 2 желтоқсан, 11:04
Биыл халықтың жалпы өлім-жітімі 28 пайызға төмендеді – Ажар Ғиният

АСТАНА. ҚазАқпарат – Биыл ана өлімі 3,5 есе төмендеді. Бұл туралы бүгін Сенаттағы Үкімет сағатында Денсаулық сақтау министрі Ажар Ғиният айтты, деп хабарлайды ҚазАқпарат тілшісі.

«Халықтың денсаулығын нығайту - Үкіметтің маңызды міндеттерінің бірі. Мемлекет басшысының халыққа медициналық көмек көрсетудің тиімділігін арттыру жөніндегі тапсырмалары аясында кешенді жұмыс жүргізіп жатырмыз. Елімізде биыл ресми статистика бойынша денсаулық сақтаудың негізгі көрсеткіштерінің оң үрдісі байқалады. 2020-2021 жылдары пандемияға байланысты халықтың денсаулығы күрт нашарлаған болатын. Ол тек Қазақстанда ғана емес, барлық дүниежүзінде байқалған үрдіс. Мәселен, өткен жылдың ұқсас кезеңімен салыстырғанда биыл 9 айда халықтың жалпы өлім-жітім көрсеткіші 28 пайызға төмендеп отыр», - деді министр.

Оның дерегінше, қан айналымы жүйесі ауруларынан болатын өлім-жітім көрсеткішінің шамамен - 32, обырдан – 9, жарақаттан - 4, тыныс алу ағзаларының ауруларынан болатын өлім-жітім - 33, ал туберкулезден болатын өлім-жітімнің 17 пайызға төмендегені байқалады.

«Биыл ана өлімі 3,5 есе төмендеді. Ал балалар арасындағы аурулар қазіргі алдын алу зерттеулердің арқасында және ковидтің салдарынан бүгінде өсіп отыр. Халық денсаулығы көрсеткіштерінің жақсаруы халықаралық рейтингтерде де байқалады. Мәселен, 2021 жылдың қорытындысы бойынша Біріккен Ұлттар Ұйымының тұрақты даму мақсаттары рейтингінде Қазақстан позициясының жақсарғаны байқалады. 2020 жылы 193 елдің ішінде Қазақстан 65-ші орынды иеленді. Ал 2022 жылдың басында Біріккен Ұлттар Ұйымы біздің мемлекетіміздің рейтингін 6 позицияға көтеріп, 59-орынға дейін жақсартты», - деді Ажар Ғиният.


Ұқсас жаңалықтар
Серіктестер жаңалықтары

Jańalyqtar