Биыл елордада 10 жаңа тұрғын үй кешені қолданысқа беріледі
Бұл туралы елорда бойынша құрылыс басқармасының басшысы Əрсен Жаңғасқанов қалалық мәслихаттың кезекті отырысында айтты.
«Тұрғын үй құрылысын дамытуға 3 жылда 114 млрд теңге бөлінген болатын. Оның 14,2 млрд теңгесі 2018 жылы, 26,3 млрд теңгесі 2019 жылы, 74 млрд теңгесі 2020 жылы бөлінді. Баспана салу «Нұрлы жер» мемлекеттік бағдарламасының аясында бюджет қаражаты есебінен іске асып жатыр. Есепті мерзімде қала бойынша 3 881 пәтерді қамтыған 16 көпқабатты тұрғын үй кешені қолданысқа берілді. Оның ішінде 8-і 1399 пәтерді қамтыған арендалық тұрғын үй кешені пайдалануға берілді. Көпбалалы отбасылар мен жас отбасылар үшін 2565 арендалық баспана сатып алынды. 2018 жылы 635 пәтерлі 4 тұрғын үй кешені, 2019 жылы 1484 пәтерлі 6 түрғын үй кешені, 2020 жылы 1862 пәтерлі 6 тұрғын үй кешені пайдалануға берілді», - дейді әкімдік өкілі.
Басқарма басшысы биылғы жылдың жоспарына да тоқталды.
«2021 жылы 43,5 млрлд теңге игеру жоспарланған. Биыл басқарма 7793 пәтерді сатып алып, қолданысқа беруді жоспарлап отыр. Олардың жалпы ауданы 392 мың шаршы метр болмақ. 10 көпқабатты тұрғын үй кешенін қолданысқа берудің есебінен 4035 пәтерді қолданысқа беру жоспарланған. Ал жылжымайтын мүлік нарығынан 1580 арендалық пәтер сатып алу жоспарда бар. 2020 жылы проблемалық нысандардағы құрылысты аяқтау үшін бөлінген кредиттерді қайтару жолында «Нұрлы жер» бағдарламасы арқылы кезекте тұрғандарға 1858 пәтер кредитке беріледі», - деді Əрсен Жаңғасқанов.