Биыл елорда оқушыларына 1 млрд теңгеге медициналық көмек көрсетілген
Жалпы соңғы 9 айында елорда оқушыларына 1 млрд теңгеден астам сомаға консультациялық-диагностикалық қызмет көрсетілген.
Мектеп медицинасы білім беру ұйымдарында, яғни тікелей мектептерде, балабақшаларда, шағын орталықтарда немесе басқа да білім беру ұйымдарындағы балаларға медициналық қызмет көрсетуді көздейді.
Бұрын мектеп медицинасы учаскелік қызметке бөлінген қаражат есебінен қаржыландырылған. МӘМС жүйесін енгізу арқылы ол жеке ұстаным ретінде бөлек қарастырылды. Бұл мектеп жасындағы балаларға арналған алдын алу шараларының кең ауқымын қамтуға мүмкіндік береді. Яни, бұл медицинаның осы бөлігіне – сырқаттың алдын алу үшін толықтай тексеруге, қандай да бір сырқат анықталған балаларды дер кезінде «Д» есепке алуға, барлық стандарттардың сақталуын бақылауға, т.б. ерекше назар аударылады.
Мектеп медицинасының мәні – білім беру ұйымдарындағы балаларды қажетті медициналық қызметтермен қамтамасыз ету. Бұл жұмыс мектеп немесе балабақша орналасқан аумаққа қарасты емхана жауапкершілігінде болады. Ол үшін мектепте медицина қызметкерінің жабдықталған кабинеттері бар арнайы қызмет құрылады. Профилактикалық тексеру немесе вакцинация жүргізу үшін мектепке (немесе балабақшаға) тиісті профильдегі дәрігерлер келеді. Мұндай іс-шаралар алдын-ала жоспарланады, және ата-аналарға алдын ала хабарланады.
«Мектеп медицинасы бөлімшесінің міндеттері мен маңызды бағыттарының бірі бөлімше қызметінің жұмысын ұйымдастыру болып табылады. Шынында да, мектепке дейін және мектеп жасында балалардың салауатты өмір сүруі қалыптасады, олар ортаға бейімделеді, баланың денсаулығы күшейеді немесе, керісінше, төмендейді. Мектеп медицинасы бөлімшесінің жұмысы осындай жағдайларды бақылап, денсаулық жағдайындағы жағымсыз процестердің дамуын болдырмау үшін ұйымдастырылған. Білім беру мекемелерінің оқушылары мен тәрбиеленушілерін медициналық көмекпен қамтамасыз ету балалар емханасының мектепке дейінгі–мектеп бөлімшесіне жүктелген. Бұл бөлімше балалар емханасының барлық басқа бөлімшелерімен тығыз байланыста жұмыс істейді. Мектеп медицинасы бөлімшесінің құрылымына білім беру мекемелеріндегі медициналық кабинеттер кіреді. Біздің емхана аумағы бойынша бөлімшеде 16 мектеп пен 10 мемлекеттік балабақша бар»,- дейді Астана қаласындағы №9 емхананың мектеп медицинасы бөлімшесінің меңгерушісі Азамат Кенжеболатұлы Мыңбаев.
Мектеп медицинасының тарифіне вакцинация, жыл сайынғы профилактикалық тексеру, тіс дәрігерінің тікелей оқу орнында жүргізетін тексеруі кіреді. Сондай-ақ оқу орнындағы дәрігерлер балаларға салауатты өмір салтын ұстану жөнінде іс-шаралар өткізеді. Егер профилактикалық тексеруде патология анықталған болса, онда бала тіркелген жері бойынша емханаға тереңдетілген медициналық тексеруге жіберіледі. Балалардың вакцинациялауы ата-аналарының келісімімен Ұлттық егу күнтізбесі бойынша жүргізіледі. Шұғыл жағдайларда медициналық пунктте жедел жәрдем бригадасы келгенге дейін балаларға алғашқы көмек көрсетіледі.