Биыл Атырау облысында 43 әлеуметтік нысан бой көтереді
Атырауда облыс әкімінің халыққа есеп беру кездесуі аяқталды. Нұрлан Ноғаев 2018 жылдың әлеуметтік-экономикалық даму қорытындылары мен болашақтағы жоспарлар туралы айтты.
Өңір басшысының айтуынша, биыл 25 білім беру нысанының құрылысы аяқталып, пайдалануға беріледі, атап айтсақ, 10 балабақша, 11 мектеп, 1 музыка мектебі, 2 жатақхана, 1 жатақханасы бар лицей.
«Денсаулық сақтау саласында жергілікті бюджет пен демеушілер есебінен үш нысанның құрылысы аяқталады, олар - Кардиология орталығына қосымша ғимарат, Құрманғазы аудандық ауруханасындағы 75 орындық ғимарат және Қызылқоға ауданы Қарабау ауылындағы фельдшерлік-акушерлік бөлімше», - деді Атырау облысының әкімі Нұрлан Ноғаев.
Сонымен қатар, биыл мың жарым орындық 9 мәдениет нысаны - мәдениет үйі, кітапхана мен музей пайдалануға беріледі. Ал спорт саласында 2019 жылы алты спорт залы, мектеп пен ДСК ашылады деген жоспар бар.