Биыл Ақмола облысында бір мың шақырым жол жөнделеді
2022 жылғы 27 маусым 16:52

Биыл Ақмола облысында бір мың шақырым жол жөнделеді

БУРАБАЙ. ҚазАқпарат - Биыл Ақмола облысында бір мың шақырым жол жөнделеді. Бұл туралы 2022 жылдың 5 айының қорытындысы бойынша өңірдің әлеуметтік-экономикалық дамуына арналған баспасөз мәслихатында аймақ басшысы Ермек Маржықпаев мәлім етті, деп хабарлайды ҚазАқпарат тілшісі.

Әкімнің айтуынша, өңірде көлік коммуникацияларын тиісті жағдайда ұстау бойынша мақсатты жұмыстар жүргізілуде. Қалалар мен аудандардағы жергілікті маңызы бар, сондай-ақ облыстық және республикалық маңызы бар автожолдар жөнделмекші.

«Өткен жылы жергілікті маңызы бар автожолдарды салуға, жөндеуге 232 жоба бойныша 38 млрд теңге қаржы бөлінді, оның ішінде 172 жоба бойынша жұмыстар аяқталды. Облыстық, аудандық маңызы бар 800 км автожол және елді мекендердің көше-жол желісі жөнделді. Биыл 1 мың км жол желісін жақсартуды жоспарлап отырмыз. Нәтижесінде жақсы және қанағаттанарлық жағдайдағы жергілікті маңызы бар автожолдардың үлесі 87 пайызға жетеді», - деп атап өтті Ермек Маржықпаев.

Айта кетсек, 2016 жылдан бастап жол құрылысы мен жөндеу жұмыстарының көлемі 4 есеге артты. 7 жыл бұрын жылына 162 шақырым жол жөнделсе, 2021 жылы бұл көрсеткіш 790 шақырымды құрады.

Еске сал кетейік, бұдан бұрын Ақмола облысындағы егістік жер көлемі 5,1 млн гектарға жеткенін жазған болатынбыз.



Ұқсас жаңалықтар
Ұлытау облысына қыркүйек айынан «Тальго» пойызы қатынайды
2022 жылғы 9 тамыз 23:55

Ұлытау облысына қыркүйек айынан «Тальго» пойызы қатынайды

НҰР-СҰЛТАН. ҚазАқпарат –Ұлытау облысына «Тальго» пойыздары жүре бастайды. Бұл туралы Индустрия және инфрақұрылымдық даму министрлігінің баспасөз қызметінен мәлім етті, деп хабарлайды ҚазАқпарат тілшісі.

«Ұлытау облысына көлік қатынасын дамыту мақсатында биыл қыркүйектен бастап Жезқазған қаласына «Тальго» пойыздары қатынайды. Ол үшін күн ара № 65/66 «Нұр-Сұлтан – Жезқазған» және № 73/74 «Алматы-2 Жезқазған» бағытындағы пойыздар жолға шығады», - деді ведомстводан.

Сонымен қатар министрлік жыл басынан бері жолаушылар пойызына жүргізілген тексерістер нәтижесін жариялады. 300 пойыз тексеруден өтіп, оларда 700-ге жуық олқылық табылған. Анықталған фактілер бойынша әкімшілік хаттамалар толтырылған.

Бұдан бөлек, мәлім етілгендей, қазір пойыз билеттерінің алып-сатарлығымен айналысатын тұлғаларды анықтау шаралары жүріп жатыр. Осыған орай ҚР ИИДМ Көлік комитетінің тапсырмасы бойынша жол жүру құжаттарын сатып алу және қайта сату фактілерінің жолын кесу мақсатында аумақтық бөлімшелер Көлік полициясының және Мемлекеттік кірістер департаменттерінің өкілдерімен бірлесіп теміржол вокзалдарында жұмыс жүргізуде.

Айта кетсек, бүгін аталған ведомствоға қарасты Азаматтық авиация комитеті жөндеуге жабылған Үшарал әуежайы пайдалануға берілгенін мәлім еткен болатын.


Нұр-Сұлтанда бір айда 11 мыңнан астам жол ережесін бұзғандар анықталды
2022 жылғы 9 тамыз 13:55

Нұр-Сұлтанда бір айда 11 мыңнан астам жол ережесін бұзғандар анықталды

НҰР-СҰЛТАН. ҚазАқпарат – 19 шілдеден бастап елордада «Қауіпсіз жол» жедел-алдын алу шарасы өтіп жатыр, деп хабарлайды ҚазАқпарат тілшісі.

Бұл туралы елордалық полиция департаменті басшысының бірінші орынбасары Бақытжан Малыбаев айтып берді.

«Қабылданған шараларға қарамастан, қала жолдарында жол-көлік оқиғаларынан зардап шегетіндер көп. Әрбір бесінші жаяу жүргіншінің кінәсінен жол апаты болады. Жол-көлік оқиғалары 9,7% және зардап шеккендер 15,4%-ға артқан, ал жолдағы өлім 33,3%-ға төмендеген. Осыған байланысты 19 шілдеден бастап қала аумағында бір ай бойы «Қауіпсіз жол» жедел-алдын алу іс-шарасы өтеді. Онда жол қозғалысы ережелерін өрескел бұзғандарға, апатқа әкеп соғатын мас жүргізушілерді анықтауға және жолын кесуге, жаяу жүргіншілермен жұмыс істеуге ерекше назар аударылады», - деді Б.Малыбаев елордада өткен баспасөз мәслихатында.

Оның айтуынша, жедел алдын алу іс-шарасында жол қозғалысы ережелерін бұзудың 11,5 мың жағдайы анықталды. Мас күйінде көлік жүргізгені үшін – 80 адам, апатты жағдай тудырғаны үшін – 224, қарсы қозғалыс жолағына шыққаны үшін – 61 және бағдаршамның тыйым салынған белгісіне өткені үшін – 315 адам ұсталды.

«Ішкі істер министрлігі әзірлеген «Қорғау» жүйесі арқылы әкімшілік айыппұлдарын төлемеген қасақана ереже бұзушылармен белсенді күрес жүріп жатыр, сондай-ақ жалған мемлекеттік тіркеу нөмірі бар автокөлікті пайдалану фактілері анықталуда. Осы жүйе енгізілгелі 4 мыңнан астам жүргізушіге 282 миллион теңге болатын әкімшілік құқықбұзушылықтар туралы хабарлама жіберілді. Жалған мемлекеттік нөмірі бар автокөлікті басқарғаны үшін 83 жүргізуші ұсталды, 368 жүргізушінің көлік айдау құқығы жоқ және 159 жүргізуші көлік айдау құқығынан айырылған, сондай-ақ сақтандыру полисінсіз жүрген 713 жүргізуші анықталды. Коммуналдық тұраққа 584 автокөлік жіберілді», - деді Б. Малыбаев.


Елордадағы Сауран көшесі екі аптаға ішінара жабылды
2022 жылғы 6 тамыз 14:49

Елордадағы Сауран көшесі екі аптаға ішінара жабылды

НҰР-СҰЛТАН. ҚазАқпарат - Нұр-Сұлтан қаласының Көлік және жол-көлік инфрақұрылымын дамыту басқармасы Сауран көшесінде жол жөндеу жұмыстары басталғанын мәлім етті, деп хабарлайды елорда әкімдігінің ресми сайты.

Осыған байланысты, 6-20 тамыз аралығында Сығанақ көшесінен Керей-Жәнібек хандар көшесіне дейінгі аралықта көлік қозғалысы ішінара жабылатын болады.

«Елорда тұрғындары мен қонақтары қала жолдарында кептеліс тудырмас үшін қозғалыс бағытын алдын ала жоспарлауы қажет. Келтірілген қолайсыздықтар үшін кешірім өтінеміз және жөндеу жұмыстарының жүргізілуіне түсіністікпен қарауды сұраймыз», – делінген ведомство хабарламасында.


Jańalyqtar

Үрдіс

MURAǴAT