Биыл 17 бала өрттен көз жұмды

НҰР-СҰЛТАН. ҚазАқпарат – Елімізде жыл басынан бері 17 бала өрт салдарынан қаза тапты. Бұл туралы ҚР ТЖМ Азаматтық қорғаныс және әскери бөлімдер комитетінің төрағасы Бауыржан Сыздықов айтты, деп хабарлайды ҚазАқпарат тілшісі.

«Соңғы 3 жылдың ішінде республика аймағында өрт салдарынан 87 бала қаза тапты. Жыл сайын елімізде балалардың отпен ойнауы салдарынан шамамен 300 өрт орын алады», - деді комитет төрағасы Орталық коммуникациялар қызметіндегі баспасөз мәслихаты барысында.

Оның атап өтуінше, балалар өлім-жітімінің негізгі себебі ата-аналардың оларды қараусыз қалдыруы, ұйықтап қалуы, өрт кезінде дұрыс іс-әрекет жасамауы болып отыр.

«Қабылданған іс-шараларға қарамастан жыл басынан бері өрт салдарынан 17 бала қаза тауып, тағы 17 бала жарақаттанды. Иістен улану салдарынан 5 бала қаза тауып, 84 бала уланып қалды», - деді Бауыржан Сыздықов.

Комитет басшысының айтуынша, балалардың отпен ойнауы салдарынан туындайтын өрттердің алдын алу мақсатында 1 211 интерактивті сабақ өткізіліп, жас құтқарушылар жасақтарымен 19 жарыс ұйымдастырылды. Өрт-техникалық орталықтарға 17 мыңнан астам баланы қамтыған 738 саяхат ұйымдастырылып, 400-ден астам ашық есік күндер өткізілді.