ФУТБОЛДАН ӘЛЕМ ЧЕМПИОНАТЫ-2022

Бірқатар дақылдардың тұқымы 100 пайыз шетелден келеді - Ақылбек Күрішбаев

2022 жылғы 2 қазан, 09:53
Бірқатар дақылдардың тұқымы 100 пайыз шетелден келеді - Ақылбек Күрішбаев

АСТАНА. ҚазАқпарат - Отандық ауылшаруашылығы өнімдері бағасының жоғары болуы делдалдардың көптігінен ғана емес, сонымен бірге өнімдердің өзіндік құнының жоғары болуына да байланысты. Табиғи-климаттық жағдайы бірдей елдерге қарағанда Қазақстанда ауыл шаруашылығы дақылдарының өнімділігі әлдеқайда төмен. Сенатор өнімділігі жоғары және құрғақшылыққа төзімді сорттар мен будандардың еліміздегі жетіспеушілігі - оның басты себебі деп санайды.

Қазақ егіншілік және өсімдік шаруашылығы ғылыми-зерттеу институтында өткен кездесу барысында отандық және шетелдік жетекші ғалымдар елімізде селекция мен тұқым шаруашылығын жедел дамыту үшін қандай шаралар қолдану керектігін талқылады.

Ақылбек Күрішбаевтың айтуынша, қазіргі уақытта сорттық тұқымдардың 60%, ал бірқатар ауыл шаруашылығы дақылдарының 100% Қазақстанға шетелден, көбіне Ресей Федерациясынан әкелінеді.

Осылайша, депутат елде азық-түлік қауіпсіздігінің негізі бұзылды деп санайды.

«Санкциялық текетірестің қазіргі жағдайында біздің әріптестеріміз сұрыптық тұқым экспортын тоқтататын болса, онда Қазақстанның ауыл шаруашылығы сапалы тұқым материалынсыз қалуы мүмкін» , - деді сенатор.

Сарапшылар шетелдік үздік селекциялық жаңалықтарды трансферттеу және бейімдеуге байланысты еліміздің солтүстігінде – Бараев атындағы астық шаруашылығының ҒӨО базасында және оңтүстігінде – Қазақ егіншілік және өсімдік шаруашылығы ғылыми-зерттеу институтының базасында қазіргі заманғы және молекулярлық биология әдістері негізінде отандық сорттар мен будан шығаратын екі селекциялық орталықты жедел түрде құруды ұсынды.

«Отандық тұқым шаруашылығында қалыптасқан жағдайдан шығудың жалғыз жолы – қазіргі заманғы селекциялық орталық құру болып отыр. Жоғары өнімді және құрғақшылыққа төзімді, жергілікті ауа-райына бейімделген өзіміздің сорттарымен біз ауылшаруашылығы өндірісіндегі тұрақтылық пен өнімділікті арттыруда айтарлықтай серпіліс жасай аламыз. Отандық ғалымдар шетелдік әріптестермен бірлесе отырып, Үкімет тарапынан тиісті мемлекеттік қолдауды талап ететін селекциялық орталықтар құру бағдарламасын әзірлеуге дайын» , - деп атап өтті Ақылбек Күрішбаев.


Ұқсас жаңалықтар
Серіктестер жаңалықтары

Jańalyqtar