Бірінші лигада «Ақжайық» «Хан Тәңірі» командасымен тең ойнады

АСТАНА. ҚазАқпарат – Бірінші лига командалары арасында футболдан Қазақстан чемпионатының 17-турында Алматының «Хан Тәңірі» командасы өз алаңында «Ақжайықты» қабылдады, деп хабарлайды ҚазАқпарат тілшісі.

Қос клуб гол соғуға тырысқанымен, көпке дейін есеп ашылған жоқ.

Ойын соңына таман 80-минутта алаң иелерінен Рашид Люхай қонақтар қақпасының кілтін таба білді. Дегенмен үш минуттан кейін «Ақжайықтан» Бақдәулет Көңілімқос қақпашы қайтарған допқа бірінші жетіп, таразы басын теңестірді – 1:1.

Б.Көңілімқос осымен үш матч қатарынан мергендік танытып отыр.

Турнир кестесінде 32 ұпаймен бұрынғыша үшінші сатыда келе жатқан оралдықтар келесі турда 3 тамыз күні өз алаңында Астананың «Жеңісін» қабылдайды.

Көш басындағы Семейдің «Елімайы» «Жас қыранды» 2:0 есебімен ұтып, ұпай санын 44-ке жеткізді.

Еске сала кетейік, бұдан бұрын бірінші лигада «Ақжайықтың» «Екібастұзды» ірі есеппен тізе бүктіргенін жазған болатынбыз.