Бердібек Сапарбаев газ, бензин, азық-түлік бағаларын тексерді

ТАРАЗ. ҚазАқпарат - Жамбыл облысының әкімі Бердібек Сапарбаев Тараз қаласындағы жанар-жағармай құю бекетін, коммуналдық нысандарды, ірі супермаркет пен әлеуметтік дүкендерді аралап, баға тұрақтылығын тексерді, деп хабарлайды ҚазАқпарат.

Аймақ басшысы алдымен Жамбыл даңғылы-Ниетқалиев көшелері қиылысындағы «Kazakh Oil» жанар-жағармай құю бекетінде болып, бензин, дизель отындарының бағасымен, бекеттің жұмысымен танысты.

Бекет қалыпты режимде жұмыс істеуде. Мұнда бензин (92) –179, (95) –208, дизель –230 теңгеден сатылуда. Ал, қала бойынша газ – 60, аудандарда – 65 теңгеден өткерілуде.

Облыс әкімі Мемлекет басшысының тапсырмасы бойынша газ, бензин, дизель бағалары реттелгенін, оны негізсіз өсіруге жол берілмейтінін атап өтті. Сондай-ақ, Бердібек Сапарбаев жауапты тұлғаларға ұзын-сонар кезектің туындамасы үшін жанар-жағармай құю бекеттерінің үздіксіз жұмысын қамтамасыз етуді тапсырды.

Келесі кезекте аймақ басшысы «Smart» ірі сауда орталығына, әлеуметтік дүкенге барды. Штаттық режимде жұмыс істеп отырған дүкендерде азық-түлік қоры жеткілікті. Әлеуметтік маңызы бар өнімдердің бағалары да шекті деңгейден аспайды.

- Осындай кезеңді пайдаланып бағаны көтеріп жіберетіндер де кездеседі. Біз ондайға жол бермеуге тиіспіз. Әлеуметтік маңызы бар азық-түлік бағаларын негізсіз көтерілуіне қатысты деректер анықталатын болса, онда қатаң шаралар қолданатын боламыз,-деді облыс әкімі.

Бұдан соң Бердібек Сапарбаев «Жамбыл су» КМК, «ТаразЭнергоОрталық» АҚ жұмысымен, «Жамбыл Жарық Сауда – 2030» ЖШС-нің жұмысымен танысты. Барлығы штаттық режимде жұмыс істеуде. Тұрғындардан шағым түспеген.