Базалық зейнетақы тағайындау тәртібі өзгертіледі - Мәжіліс
Денсаулық сақтау және әлеуметтік даму министрі Тамара Дүйсенованың айтуынша, заң жобасында зейнетақы жүйесіне қатысу өтіліне байланысты базалық зейнетақы тағайындау тәртібі өзгертіліп отыр. Атап айтқанда, 2017 жылдың 1 шілдесінен бастап базалық зейнетақы тағайындау тәртібі өзгеретін болады.
«Базалық зейнетақы азаматтар зейнеткерлік жасқа жеткен кезде ғана және зейнетақы жүйесіне қатысу өтіліне байланысты тағайындалады. Зейнетақы жүйесіне қатысу өтілі 10 жылдан аз және еңбек өтілі болмаған жағдайда базалық зейнетақының мөлшері ең төмен күнкөріс деңгейінің 50 пайызына тең болады. Бұдан бөлек, 10 жылдан артық еңбек өтілінде әрбір жыл үшін 2 пайызға артып отырады. Бірақ, еңбек өтілі 35 және одан да көп жыл болған жағдайда зейнетақы ең төменгі күнкөріс деңгейінің 100 пайызынан аспауы тиіс»,-деді министр Тамара Дүйсенова.
Сонымен қатар, заң жобасы арқылы әскери қызметкерлерді, яғни, әлеуметтік құрылымдардағы қызметкерлерді зейнетақымен қамсыздандыру 2016 жылдың 1 қаңтарынан бастап мемлекеттік бюджет есебінен жүзеге асырылады.
Бұдан бөлек, министрдің сөзіне қарағанда, азаматтардың зейнетақымен қамтамасыз етуі бойынша жұмыс берушілердің жауапкершілігін күшейту мақсатында 2018 жылдың 1 қаңтарынан зейнетақы жүйесінің жаңа шартты-жинақтаушы құрамдасын енгізу ұсынылады.
«Бұл жұмыс берушінің есебінен жұмысшы кірісінің бес пайызы мөлшерінде міндетті зейнетақы жарналарынан қалыптасады. Жұмыс берушілер тарапынан аударылатын бес пайыздық міндетті зейнетақы жарнасы Бірыңғай жинақтаушы зейнетақы жүйесінде ашылған әрбір жұмысшының шартты зейнетақы шотында көрсетілетін болады. Мұндай зейнетақы салымдары азаматтардың меншігі болып табылмайды», - деді Т. Дүйсенова.