Байқоңырда 3 тәуліктен бері көшелер мен жолдар судан тазартылуда

БАЙҚОҢЫР. ҚазАқпарат - Байқоңырда көшелер мен аулаларды су басу жағдайы әлі күрделі күйінде қалып отыр, деп хабарлайды ҚазАқпарат тілшісі.

Ғарыш қалашығының орталық көшелері құрғатылғанымен қаланың төменгі бөлігінде орналасқан 7-ші шағын ауданында тиісті жұмыстар тәулік бойына жүргізіліп жатыр, алайда су деңгейі айтарлықтай төмендеген жоқ, деп хабарлады қала әкімдігіндегілер.

Жағдайдың бұлайша өріс алуы мамандардың пікірінше, топырақ құрамының қатып қалғандығымен және қалада жаңбыр суы ағатын жүйенің болмауымен байланысты. Мұндай жүйені қалалық коммуналдық қызмет өкілдері көптен бері қажет етпеген. Өйткені мұндай мол көлемде қардың түсуі немесе жауын жаууы көп жылдардан бері болмаған.

Тұрғын үй коммуналдық шаруашылық саласының мамандары суды сорғыту жұмыстарын жалғастыруда.