Batys Qazaqstanda 275 kósheniń ataýy ózgerdi
Oblystyq tilderdi damytý basqarmasynyń basshysy Aıgúl Myńbaevanyń aıtýynsha, sonyń ishinde 83-i - Oral qalasynyń úlesinde.
«Bıyl BQO ákimdigi janyndaǵy oblystyq onomastıka komıssıasynyń úsh otyrysy jáne respýblıkalyq onomastıka komıssıasynyń qorytyndylary boıynsha 10 aýdan (Aqjaıyq, Bókeı ordasy, Bórli, Jańaqala, Zelenov, Qaztalov, Syrym, Tasqala, Terekti, Shyńǵyrlaý aýdandary) jáne Oral qalasynyń 275 kóshesine,14 shaǵyn aýdanǵa, 6 eldi mekenge, 2 skverge, 1 alańǵa ataý berý nemese qaıta ataý boıynsha oń qorytyndy berildi.
Oǵan qosa, Qazaqstan Respýblıkasy Úkimetiniń 2018 jylǵy 9 shildedegi №413 qaýlysymen Tasqala aýdanynyń 8 bilim berý uıymy qaıta ataldy. Syrym, Qaztalov jáne Shyńǵyrlaý aýdandaryndaǵy jańadan boı kótergen shaǵyn aýdandardaǵy kósheler «Astana», «Astanaǵa - 20 jyl» ataýlaryn ıelendi», - dedi Aıgúl Ádilgereıqyzy.
Aıta keteıik, ótken jyly oblystyq onomastıkalyq komıssıa otyrysynyń qorytyndysy boıynsha Aqjaıyq, Bókeı ordasy, Jańaqala, Zelenov, Kaztalov, Syrym, Terekti, Shyńǵyrlaý aýdandary men Oral qalasynyń ıdeologıalyq turǵydan eskirgen nemese jańadan boı kótergen 127 kóshesine, 1 shaǵyn aýdanǵa jáne 4 eldi mekenge «Máńgilik el» ıdeıasyna saı keletin ataýlar berilgen bolatyn.
Sonymen qatar, QR Úkimetiniń 2017 jylǵy 15 maýsymdaǵy №368 qaýlysymen M. Yqsanovtyń esimi Jánibek kolledjine berilse, QR Úkimetiniń 2017 jylǵy 15 jeltoqsandaǵy №838 qaýlysymen oblystyq qazaq drama teatryna Hadısha Bókeevanyń, oblystyq mádenıet jáne óner ortalyǵyna Qadyr Myrza Álıdiń, Syrym aýdandyq ortalyqtandyrylǵan kitaphana júıesine Muqades Eslamǵalıulynyń jáne Oraldaǵy №30 jalpy orta mektepke Hıýaz Dospanovanyń esimderi berildi.