Батыс Қазақстанда жыл басынан бері 13,5 мыңнан астам адам коронавирус жұқтырды

ОРАЛ. ҚазАқпарат – Батыс Қазақстан облысында жыл басынан бері 13 523 адам коронавирус жұқтырды, деп хабарлайды ҚазАқпарат тілшісі.

БҚО денсаулық сақтау басқармасының баспасөз қызметі мәлім еткеніндей, соның 8 848-інде ауру белгілері болса, 4 675-і – симптомы жоқтар.

Ауырғандардың басым көпшілігі, яғни 56 пайызы (7 579) Орал қаласы, 13,8 пайызы (1 878) Бәйтерек, 11,3 пайызы (1 530) Бөрлі ауданының үлесіне тиеді.

Қазіргі кезде облыста 1 123 төсектік 18 инфекциялық стационарда 388 науқас ем қабылдап жатыр.

«Індет басталғаннан бері өңірде 22 744 адам тіркелсе, соның 13 513-інде ауру белгілері бар, 9 231-і – симптомы жоқтар. 17 831 адам сауығып шықса, 340 науқас көз жұмды. Соңғы тәулікте 95 адамнан (64-інің ауру белгілері бар) коронавирус табылса, 32-сі жазылып шықты. Соңғы аптада алдыңғымен салыстырғанда, ауру жұқтыру көрсеткіші 6 пайызға (39 адамға) төмендеді», деп хабарлады ведомстводан.

Өңірде осы кезге дейін 69 383 тұрғын вакцинаның бірінші, 32 851-і екінші компонентін қабылдады.

Еске сала кетейік, бұдан бұрын Батыс Қазақстанда 8 700-ден астам медицина қызметкеріне 2,5 млрд теңге үстемеақы төленгенін жазған болатынбыз.